Shtetet e Bashkuara të Ameriëks kanë zgjatur mbylljen e kufijve tokësorë me Kanadanë dhe Meksikën deri në 21 gusht, ndërsa rastet me koronavirus kanë ardhur në rritje. Kufizimi vlen për të gjitha udhëtimet që janë jo-thelbësore siç është turizmi.
Zgjatja e radhës 30-ditore erdhi pasi Kanadaja njoftoi të hënën se do të fillojë të lejojë vizitorët e vaksinuar amerikanë në 9 gusht edhe për udhëtime që janë jo-thelbësore.
Departamenti i Sigurisë Kombëtare (DHS) tha të mërkurën se është në kontakt të vazhdueshëm me homologët kanadezë dhe meksikanë për të identifikuar kushtet në të cilat kufizimet mund të lehtësohen në mënyrë të sigurt dhe të qëndrueshme.
Ndërkohë, sipas reuters Shtëpia e Bardhë po planifikon një raund të ri takimesh të nivelit të lartë këtë javë për të diskutuar kufizimet e udhëtimit dhe potencialin e mandatimit të vaksinave COVID-19 për vizitorët, por asnjë vendim nuk është marrë ende.
Rishikimi vjen në mes të shqetësimit në rritje midis zyrtarëve amerikanë për variantin Delta. Zyrtarët shëndetësorë amerikanë kanë raportuar rritje të konsiderueshme në rastet e COVID-19 dhe vdekjeve, me shpërthime të ndodhura në pjesë të vendit me norma të ulëta të vaksinimit. Rastet me variantin Delta, i zbuluar së pari në Indi, përbëjnë rreth 83% të infektimeve me Covid-19 në SHBA.
