Një rritje e papritur e rasteve të infeksionit nga Covid-19 ka qenë shqetësuese këto ditë në vendin tonë, ku sot u shënua shifra rekord me 69 raste të reja.
Në këto kushte frika se mund të kthehemi pas dhe të izolohem sërish ka qenë e madhe, ndonëse ekspertët e kanë përjashtuar një mundësi të tillë.
Së fundmi, mjeku imunolog Genc Sulçebe, teksa komentoi situatën aktuale nga koronavirusi, nuk e konsideroi si një kthim të një vale të dytë të Covid-19.
Në një intervistë për A2 ai u shpreh se kjo situatë është rrjedhojë e epidemisë dhe duhet t’i pranojmë këto shifra.
“Nuk mund të themi se kemi një valë të dytë. Ne kishim një mbyllje të plotë dhe si rrjedhojë edhe virusi nuk qarkulloi. Në momentin që nisi hapja normalisht kemi edhe lëvizje të virusit. Unë mund ta konsideroj si një shfaqje fiziologjike. Virusi nuk u zhduk. Kjo situatë është rrjedhojë e epidemisë dhe duhet t’i pranojmë këto shifra. Ai bllokim pati shumë gjëra pozitive. Këto shifra kanë qenë në vendin tonë 10 herë më të ulëta se në vendet e tjera”.
Sulçebe theksoi se është e nevojshme që të identifikohen dhe të izolohen të gjithë personat mbi 60 vjeç dhe ata që kanë sëmundje, ndërsa maskat sipas tij, duhet të bëhen të detyrueshme.
“Njerëzit e rrezikuar duhet të identifikohen. Moshat mbi 60 vjeç dhe ata që kanë sëmundje të tjera kronike, tumorale, janë shumë të rrezikuara dhe duhet të izolohen. Aktualisht nuk mund të bëjmë jetë normale. Qytetarët duhet të bëjnë një jetë normale, ndërsa grupi i atyre që janë të rrezikuar duhet të ruhen në mënyrë të jashtëzakonshme. Mbajtja e maskës në publik duhet të bëhet e detyrueshme. Heqja dhe vënia e maskës mund të jetë e rrezikshme. Edhe policia e rendit duhet të marrë masa për të parandaluar grumbullimet.”
Kujtojmë se sot në vendin tonë u shënua numri më i lartë i rasteve të reja, pasi Ministria e Shëndetësisë raportoi për 69 raste të reja, duke e çuar numrin total të të infektuarve në 1590.
Gjithashtu, gjatë orëve të fundit kanë fituar betejën me virusin edhe 11 persona të tjerë, teksa aktualisht në spitalin Infektiv po marrin shërbim 50 pacientë, 7 prej tyre janë në terapi intensive dhe një i intubuar.
Në vendin tonë janë aktualisht 499 persona aktivë me Covid-19.
