Ditët e fundit Kosova ka njohur një rritje të rasteve pozitive me koronavirus, ndërsa sot janë vendosur edhe masa të reja kufizuese. Në konferencën për media, ministry Arben Vitia ka deklaruar se më shumë se 97% e rasteve janë me variantin britanik dhe kjo ka shtuar nevojën për të marrë masa të reja. Vitia tha se nëse vazhdohet me këtë ritëm në pak ditë numri i të shtruarve në spitale mund të kalojë 1 mijë.
“Mbi 97 për qind e mostrave kanë rezultuar pozitiv me variantin britanik dhe e ndryshon situatën epidemiologjike. Ky variant është dëshmuar se është shumë më shpërndarës, varianti britanik i virusit sulmon më shumë të rinjtë dhe të rejat sesa varianti klasik i coronavirusit, kjo ka shtuar edhe nevojën për ndërmarrjen e masave sa më shpejt. Një nga arsyet e intervinimit të mbylljes së shkollave është ky variant. Varianti ka shtuar shqetësimet dhe ka rritur alarmin. Gjendja në spitalet tona është e rëndë. Sipas projeksioneve të profesionistëve shëndetësor nëse shkojmë më këtë ritëm brenda pak ditësh numri i të shtrirëve në spitalet tona do të kalojë mbi 1 mijë. Një pjesë tjetër e qytetarëve më të drejtë kanë fajësuar fushatën elektorale për rritjen e rasteve të infektimit. Edhe kjo është e vërtetë. Çfarëdo tubimi masiv është super shpërndarës”, deklaroi Vitia.
Ditën e sotme Kosova mori masat e reja kufizuese duke vendosur orën policore 22:00 deri në 05:00. Të vetmet aktivitete që do të qëndrojnë hapur në vend janë farmacitë, marketet dhe furrat e bukës. Grumbullimet janë të ndaluara, ndërsa çdo qytetar i huaj që hyn në Kosovë duhet të jetë i pajisur me një test PCR për koronavirus që është negative dhe i kryer Brenda 72 orëve.
