Deputetja e Partisë Demokratike dhe njëkohësisht nënkryetarja e Komisionit të Ekonomisë, Sorina Kota ka thënë se Autoriteti i Konkurrencës duhet të japë llogari para këtij komisioni dhe para shqiptarëve, sa i përket rritjes së çmimit të bukës.
Ajo bëri me dije se ditën e hënë do të nisin tentativat për ta sjellë AK-në para komisionit.
“Autoriteti duhet të japë llogari para Komisionit të Ekonomisë dhe para gjithë shqiptarëve se çfarë po ndodh me shportën e tyre. Janë autoritetet shtetërore që duhet të ndërhyjnë për të balancuar tregun. Ditën e hënë ne do të nisim tentativat për të sjellë Autoritetin në Komision. Po bëjmë një relacion, që do ja paraqesim shumë shpejt Kuvendit”, deklaroi Koti.
Kujtojmë se Autoriteti i Konkurrencës votoi 3 vota pro dhe 2 kundër, për të mos gjobitur kompanive që rritën çmimin e miellit në Shqipëri. Pavarësisht hetimeve, AK doli në përfundimin se mjaftonte paralajmërimi ndaj këtyre kompanive, të cilat u koordinuan mes tyre për të rritur njëkohësisht çmimin e miellit dhe rrjedhimisht sollën rritjen e çmimit të bukës. Edhe pse kjo lëvizje ishte shkelje e hapur e rregullave të konkurrencës dhe rëndoi xhepat e qytetarëve shqiptarë, AK nuk u lodh më shumë se sa të bënte një paralajmërim për kompanitë.
