Banorët dhe bizneset e Tiranës do të paguajnë 36 milionë euro për taksën e ndërtesave në vitin 2025, sipas projektbuxhetit të ri të Bashkisë.
Kjo shifër shënon një rritje prej 74% krahasuar me mesataren vjetore të periudhës 2019-2023, duke i kushtuar taksapaguesve rreth 15 milionë euro shtesë në vit.
Ndryshimi vjen si pasojë e rritjes së çmimit të referencës së ndërtesave nga gushti i vitit 2024, pavarësisht se niveli i taksës ka mbetur i pandryshuar.
Bizneset tashmë kanë paguar detyrimet shtesë për periudhën gusht-dhjetor 2024, pas një periudhe paqartësie që shkaktoi bllokimin e llogarive të shumë subjekteve.
Taksa e ndërtesës përbën 13% të të ardhurave të përgjithshme të Bashkisë, bazuar në të dhënat e 10-mujorit të 2024. Shkalla e taksimit varion sipas përdorimit të pronës: 0.05% për banesat, 0.2% për njësitë që përdoren për aktivitet ekonomik, dhe 30% e shkallës përkatëse për sipërfaqet ndërtimore të papërfunduara.
Ndryshimi i çmimeve të referencës hyri në fuqi më 28 korrik 2023, duke prekur një pjesë të konsiderueshme të njësive administrative në kryeqytet. Për familjarët, ndryshimi u aplikua në gusht 2023, ndërsa për bizneset në shtator 2024.
Sipas të dhënave nga Ujësjellës-Kanalizime Tiranë, që vepron si agjent tatimor për familjarët, nga 207,552 abonentë të faturuar mesatarisht çdo muaj gjatë 2024, vetëm 170,778 kanë kryer pagesat. Në tetor 2024, 28,772 abonentë ishin të përjashtuar nga taksa e ndërtesës.
Bashkia parashikon që viti 2024 do të shënojë arkëtimet më të larta të 6 viteve të fundit, si rezultat i rritjes së arkëtimeve dhe ndryshimit të bazës së taksueshme. Planifikimi për vitet 2025-2027 bazohet në të dhënat e Drejtorisë së Përgjithshme të Taksave dhe Tarifave Vendore për bizneset dhe në vlerësimet paraprake të Agjentit Tatimor për familjarët.
