Ditën e sotme biznesmeni Gjergj Luca nga Elbasani u ka kërkuar të gjitha punëtoreve që të dalin të ankohen për problemet që kanë mbi rritjen e çmimeve të shportës ushqimore si edhe të karburanteve. Ai i ka mbledhur disa nga punëtoret e tij para fabrikave, dhe ka thënë se duhet të dalin para kryeministrisë për të kërkuar lehtësira si dhe që të ndërrohen politikat e asistencës sociale.
“Unë kam një problem me politikën e asistencës sociale. Pse ju që punoni prodhoni paguani taksa dhe rrini 28 ditë në punë dhe mbani fëmijët dhe lani burrin, mbani peshë historinë e familjes duhet të paguani taksa. Dhe ato komshijet e juaja që i keni parazitë me asistencë sociale kërkojnë lekë nga shteti me i kompesu faturat e energjisë, lekë nga shteti për ti çuar fëmijët në universitete për të marrë një 5 dhe për të marrë një diplomë. Ju të gjithë ju duhet t’i ngrini këto probleme e duhet të çoheni peshë dhe ndonjë ditë do t’ju marr të gjithëve, do ngre edhe nja 10 fabrika të tjera dhe do shkoj para kryeministrisë dhe të gërthas.
Të ndërroni politikat e asistencës sociale, sepse nuk mundet në këtë vend ca të Lenës dhe ca të Prenës, ca punojnë dhe i del shpirti, ca rrinë te shtëpia dhe përmes duarve tuaja dhe taksave tuaja duhet të paguahen. Kjo është e turpshme. Kjo punë nuk duhet të ndodhë. Të gjithë ata banditë, ata mashtrues, rrenacakë që janë të gjithë derivate te politikës që flasin ditë e natë në televizorë dhe bëjnë politikën e djallit për të çuar ujë tek e keqja, ajo është e turpshme. Duhet të mbyllin gojën para jush sepse ju jeni në këtë vend e vërteta. E vërteta që krijohet përmes punës, jo nëpërmjet horrave. Kam kaq kohë që bërtas puna dhe e vërteta. Nuk kanë as kurajën të më shikojnë në sy, të më thërrasin në kanalet televizive për tu ballafaquar me këta horra”, u shpreh ai.
Ai gjithashtu tha se meqenëse është rritur shporta e ushqimeve, do të paguaj 8% më shumë për të gjitha prodhimet.
“Ajo që do bëj unë është që meqë është rritur paketa e ushqimeve, unë do të paguaj 8% më shumë, do të paguaj 8% më shumë të gjithë prodhimin. Sa herë keni pasur probleme, me keni çuar fjalë. Ju kam zhgënjyer ndonjëherë? A jeni në rregull me vëllain tuaj. Ju lutem çoni zërin. Ju jeni nëna fëmijësh. Ju mbani fëmijë e burra, e pleq dhe komshijet tuaja tallen me djersën tuaj. Këtë mos e harroni prej Gjergj Lucës dhe duhet të flisni ku të mundeni”, tha ai.
