Kryedemokrati Lulëzim Basha, ka reaguar në lidhje më të dhënat e fundit zyrtare të publikuara që tregojnë se numri i aplikantëve për azil ka pasur trend rritës.
Ai shprehet se shqiptarët duan të largohen nga vendi dhe aryseja është korrupsioni. Basha thotë se rritja e aplikimeve për azil dëshmon se zgjedhjet e 25 prillit nuk zgjidhën asgjë për shqiptarët. Sipas kreut të PD-së fundi i kësaj situatë kërkon një përballje frontale me korrupsionin.
“Me përjashtim të një lufte civile, një nga arsyet madhore pse njerëzit largohen nga vendi i tyre është korrupsioni. Rritja e aplikimeve për azil në vendet e BE-së dëshmon edhe njëherë se masakra e 25 prillit nuk zgjidhi asgjë për shqiptarët. Fundi i kësaj katastrofe kombëtare, kërkon një përballje frontale me korrupsionin, duke thyer bashkëpunimin mes politikës, krimit dhe oligarkisë, që ka shkërmoqur demokracinë dhe po mbyt të ardhmen e Shqipërisë duke e bërë të pajetueshme për familjet shqiptare. #vettingnëpolitikë”, shkruan kreu i PD.
Kujtojmë qe sipas të dhënave nga EASO, zyra europiane e azilantëve, aplikimet për azil në muajin gusht arritën në mbi 1400, me një rritje prej 46% në krahasim me korrikun dhe më shumë se dyfishi në raport me muajin qershor.
Në gusht 2021, rreth 1200 ishin aplikime të reja dhe rreth 230 ishin riaplikime. Në krahasim me shtetet e tjera të rajonit, shqiptarët mbajnë rekord për numrin e aplikimeve në gusht, duke rezultuar gati katër herë më të larta sesa shteti i dytë pas nesh, që është Maqedonia e Veriut.
