Fondet e investimeve kanë vijuar tendencën rritëse gjatë muajve të parë të këtij viti. Sipas të dhënave të Autoritetit të Mbikëqyrjes Financiare (AMF) në fund të muajit qershor, vlera neto e aseteve të Fondeve, arriti rreth 71.85 miliardë lekë me një rritje prej 4,448 milionë lekë ose 6.6%, krahasuar me fundin e vitit 2020.
Ky treg dominohet kryesisht nga investimet në Obligacione Qeveritare, të cilat përbëjnë 64.22% të aseteve të fondeve, me një rritje prej 0.68% krahasuar me 31.12.2020.
Numri i anëtarëve që kanë investuar në Fondet e Investimit më 30.06.2021 është 35,906 me një rritje prej 9.95% krahasuar me 31.12.2020, shkruaj Monitor.
“Raiffeisen Prestigj” (61.63% të tregut sipas vlerës së aseteve neto), “Raiffeisen Invest Euro” (11.77%) dhe “Raiffeisen Vizion” (20.36%) dominojnë tregun, të ndjekura nga “Credins Premium” (4.83%).
Pesha e operatorëve të tjerë mbetet minimale, duke zënë më pak se 1% të tregut.
Sipas AMF, gjatë periudhës 30.06.2021, në tregun e fondeve të investimeve ushtruan aktivitetin e tyre nëntë fonde investimi. Fondi i investimeve “Raiffeisen Prestigj”, “Raiffeisen Invest Euro”, “Raiffeisen Vizion” dhe “Raiffeisen Mix” të administruara nga shoqëria “Raiffeisen Invest”, fondi i investimeve “Credins Premium” nën administrimin e shoqërisë administruese “Credins Invest”, fondi “WVP Top Invest” dhe fondi “WVP GLOBAL” administrohet nga shoqëria “WVP Fund Management Tirana sh.a”, fondi i investimeve “Albsig Standard” nën administrimin e shoqërisë administruese “Albsig Invest” sh.a, fondi “ABI EIA” administrohet nga shoqëria “ABI Invest”.
