Gripi dhe viruset e tjera respiratorë kanë rënduar situatën epidemiologjike në vend, duke çuar në një rritje të ndjeshme të sëmundshmërisë që nga fillimi i janarit.
Zyrtarisht, raportohen mbi 11 mijë të prekur në javë, por shifrat reale mund të jenë shumë më të larta pasi jo të gjithë pacientët kërkojnë ndihmën e mjekut të familjes.
Sipas Institutit të Shëndetit Publik, grupet më të prekur janë fëmijët nën 1 vjeç dhe ata të moshës 1 deri 14 vjeç.
Virusi respirator sinsincial është më dominues në këtë grup, duke çuar në një rritje të vizitave në qendrat shëndetësore dhe shtrimeve në spital. Kurba e infektimeve është në rritje dhe piku i sëmundshmërisë pritet të arrihet në fund të janarit ose fillim të shkurtit.
Në nivel kombëtar, Gjirokastra ka numrin më të lartë të rasteve me grip, e ndjekur nga Durrësi, Elbasani dhe Vlora.
Aktualisht në qarkullim janë disa viruse respiratorë, me gripin e tipit A dhe RSV si më dominuesit. Ekspertët nuk përjashtojnë edhe praninë e metapneumovirusit, i cili është shfaqur çdo dimër në vend.
