Greqia ka regjistruar këtë të mërkurë numrin më të lartë të infektimeve me Covid-19, që prej fillimit të pandemisë, me 865 raste pozitive, gjë që ka bërë që autoritetet të zbatojnë masa shtesë në disa zona të vendit.
Bëhet me dije se kjo shifër e ka ka tejkaluar rekordin e fundit të rasteve, të regjistruar të martën, prej 667 infeksioneve në një ditë dhe ka çuar gjithsej rastet e konfirmuara Covid-19 në 27,334. Në total, 534 njerëz kanë vdekur në Greqi nga Covid-19 që kur filloi pandemia në shkurt.
E gjendur nën këtë trysni, qeveria greke e Mitsotakisit, ka vendosur që nga e premtja të nis mbyllja për dy javë e njësisë periferike të Kastoriás, vetëm një javë pasi shpalli mbyllje për shkak të valës së dytë të pandemisë në Kozani, të dy zona në veriperëndim të vendit.
Kështu, hyrja dhe dalja e këtyre njësive periferike është e ndaluar, si dhe përdorimi i maskës është i detyrueshëm si brenda dhe jashtë. Po ashtu edhe të gjitha takimet në zonat publike ose private janë pezulluar.
Për më tepër, tregtia mbyllet, përveç dyqaneve të ushqimeve, bare, restorante, parukeri, kinema, muze dhe site arkeologjike. Të gjitha ngjarjet kulturore, të tilla si teatrot ose shfaqjet muzikore, anulohen dhe të gjitha qendrat sportive do jenë të mbyllura.
Kolegjet do të qëndrojnë të hapura, por duke ndjekur me përpikëri detyrimin për të mbajtur maskë kudo, ndërsa universitetet do të funksionojnë vetëm online./GazetaReforma.com/
