Dhomat e Specializuara të Kosovës në Hagë refuzuan të mërkurën mocionin e mbrojtjes që kërkonte heqjen e disa fakteve materiale nga aktakuzat ndaj ish-krerëve të Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi.
Mbrojtja kërkonte që të përjashtoheshin nga procesi ngjarjet para majit 1998 dhe pas 20 qershorit 1999, por kryetari i trupit gjykues, Charles Smith, sqaroi se këto incidente nuk përbëjnë akuza të veçanta, por janë pjesë përbërëse e akuzave ekzistuese.
Ai theksoi se rregulla 130 e Rregullores së Procedurës dhe Provave të Dhomave të Specializuara nuk lejon rrëzimin e pjesëve të aktakuzës që nuk përfaqësojnë akuza të pavarura.
Gjykata kërkon një shqyrtim të plotë të çdo pike të aktakuzës dhe jo të fakteve individuale që e përbëjnë atë.
Smith sqaroi gjithashtu se shumë nga ngjarjet që kundërshtohen lidhen me krime kundër njerëzimit, për të cilat nuk është e nevojshme të provohet ekzistenca e një konflikti të armatosur, dhe për këtë arsye, edhe nëse do të pranoheshin pretendimet e mbrojtjes, ato nuk do të çonin në rrëzimin e ndonjë pike të aktakuzës.
Më 15 prill 2025, Zyra e Prokurorit të Specializuar njoftoi përmbylljen e paraqitjes së provave në këtë çështje.
Aktakuza ndaj Thaçit, Veselit, Krasniqit dhe Selimit u konfirmua më 30 shtator 2022 dhe përfshin dhjetë pika për krime lufte dhe krime kundër njerëzimit.
Të akuzuarit janë në paraburgim në Hagë që nga nëntori i vitit 2020, ndërsa procesi gjyqësor është duke vijuar me dëgjimin e dëshmitarëve. Ata u deklaruan të pafajshëm në fillim të gjykimit më 3 prill 2023.
Dhomat e Specializuara, të themeluara në vitin 2015 nga Kuvendi i Kosovës, janë ngritur për të hetuar krimet e supozuara të ish-pjesëtarëve të UÇK-së të kryera gjatë periudhës 1998-2000, dhe kanë seli në Hagë të Holandës
Ndërkohë, gjykata po përballet me kritika për mungesë transparence dhe kufizim të aksesit publik, ndërsa Avokati i Popullit të Kosovës ka ngritur shqetësime për respektimin e standardeve të një procesi të drejtë.
Në të njëjtën kohë, më 15 korrik, paneli i Gjykatës së Apelit uli dënimin e Pjetër Shalës nga 18 në 13 vjet burg, duke refuzuar pjesën më të madhe të ankesës së tij, por duke gjetur shkelje në vendimin fillestar.
Procesi ndaj ish-krerëve të UÇK-së vazhdon, ndërsa faza e prezantimit të dëshmitarëve nga Zyra e Prokurorit të Specializuar u mbyll më 1 prill 2025.
