Një aksident i rëndë ajror ka tronditur Indinë paraditen e së enjtes, kur një avion i Air India, tipi Boeing 787 Dreamliner, u rrëzua menjëherë pas ngritjes nga aeroporti i Ahmedabadit.
Fluturimi AI171 kishte si destinacion aeroportin Gatwick në Londër, por përfundoi në një katastrofë disa sekonda pas ngritjes.
Të dhënat e radarëve tregojnë se avioni nuk arriti të ngjitej më shumë se 188 metra lartësi përpara se të binte mbi një zonë të banuar.
Në bord ndodheshin 230 pasagjerë dhe 12 anëtarë të ekuipazhit. Sipas burimeve të shpëtimit, deri më tani janë konfirmuar të paktën 30 viktima, ndërsa dhjetëra të tjerë rezultojnë të plagosur ose të bllokuar nën rrënoja.
Në bord ndodheshin 169 shtetas indianë, 53 britanikë, 7 portugezë dhe 1 kanadez, përfshirë 11 fëmijë dhe 2 foshnje.
Avioni u përplas në afërsi të Kolegjit Mjekësor BJ, mbi ambientet e konviktit, ku raportohet se mes viktimave janë edhe studentë.
Piloti, Kapiteni Sumit Sabharwal, së bashku me oficerin e parë Clive Kundar, arritën të lëshojnë një sinjal emergjent “Mayday”, por nuk pati më komunikime të tjera përpara përplasjes.
Pamjet nga vendngjarja treguan një shpërthim të fuqishëm të zjarrit, pasuar nga një re tymi të zi që u ngrit mbi zonën e banuar të Meghaninagarit, vetëm gjysmë milje larg pistës.
Zjarrfikësit dhe ambulancat mbërritën me urgjencë në vendngjarje, duke evakuuar të mbijetuarit dhe duke tentuar të shuajnë flakët e shkaktuara nga sasia e madhe e karburantit.
Ky është aksidenti i parë në historinë e avionëve Boeing 787 Dreamliner, një model i avancuar teknikisht që nga nisja e fluturimeve komerciale në vitin 2011 ka kryer mbi 5 milionë fluturime pa incidente të rënda.
Reagime zyrtare:
• Kryeministri i Indisë, Narendra Modi, reagoi në rrjetin X, duke e cilësuar tragjedinë “dhimbje përtej fjalëve”.
• Ministri i Aviacionit Civil, Ram Mohan Naidu Kinjarapu, u shpreh i tronditur dhe njoftoi mobilizimin e të gjitha agjencive emergjente.
• Ministria e Jashtme e Britanisë së Madhe po punon me autoritetet indiane për të mbështetur qytetarët britanikë të përfshirë. Shtetasit britanikë që kanë nevojë për ndihmë janë udhëzuar të kontaktojnë në numrin konsullor: 020 7008 5000.
Kompania Boeing deklaroi se është në kontakt me autoritetet për të mbledhur informacion mbi shkaqet e mundshme. Ekspertët thonë se humbja e lartësisë në mënyrë të menjëhershme dhe thirrja emergjente e pilotit tregojnë për një dështim kritik në fazën e ngjitjes, ndoshta i lidhur me motorët ose me sistemin hidraulik.
Air India, në pronësi të Grupit Tata që prej vitit 2022, deklaroi se është e përkushtuar të ndihmojë të prekurit dhe po bashkëpunon ngushtë me autoritetet për hetimin.
Hetimet vijojnë, ndërkohë që sektori i aviacionit në Indi ndodhet nën presion të lartë, përballë një prej katastrofave më të rënda ajrore të dekadës së fundit në vend.
