Para dy ditësh, banorët e fshatit Bajkaj në Delvinë kanë dalë në protestë pasi janë kundër hapjes së gurores në fshatin e tyre. Sipas tyre gurorja do të dëmtojë zonën dhe nuk i shërben aspak komunitetit. Ata shprehen se gurorja ndot ambientin dhe prish bimësinë.
Është raportuar gjithashtu se ka pasur edhe organizim për një dëgjesë publike mes Ministrisë së Infrastrukturës, Bashkisë Delvinë dhe firmës së gurores. Banorët e fshatit pretendojnë se nuk janë njoftuar dhe se njoftimin e kanë marrë nëpërmjet personave të tjerë dhe jo në rrugë zyrtare. Banorët shprehen të shqetësuar se atje ekziston mundësia e ndërtimit të dy guroreve dhe jo vetëm një të tillë.
Një banor i pranishëm në protestë u shpreh se: “Një situatë e tillë ishte edhe para një viti por ne menduam se u mbyll, ne nuk na ka ftuar as Bashkia dhe as Ministria por firma që do të ndërtojë këtë gurore. Madje edhe një gurore që është këtu aktualisht ne duam ta heqim, unë kam bërë 100 shkresa që ajo të hiqet. Ajo na ka prishur lumin. Nëse ndërtohet, unë do t’i vë flakën landfillit sepse jemi qelbur. Ne kemi një javë që nuk vemë dot në shtëpi”.
Por përpos protestave të banorëve, sipas një komunikimi që gazeta “Reforma”, zhvilloi me Kryetaren e Bashkisë së Delvinës, rezulton se një lajmërim i tillë është publikuar. Për këtë çështje gazeta “Reforma” posedon dhe lajmërimin zyrtar. Aty duket qartë që edhe Bashkia e Delvinës është njoftuar.
Ku do të ndërtohet gurorja dhe nënshkrimi i peticionit
Ekzaktësisht gurorja është planifikuar të hapet në një ish- zonë ushtarake 96 mijë metër katrorë në Qafën e Breshërit, një zonë e mbrojtur për karakteristikat e saj mjedisore.
Protestat janë zhvilluar në këtë vend dhe kanë sjellë edhe një përplasje fizike të banorëve me përfaqësuesit e firmës.
Banorët kanë nënshkruar një peticion ku kanë kërkuar që gurorja të mos hapet në fshatin e tyre. Ndërkohë mësohet nga Bashkia e Delvinës se institucioni lokal nuk ka pasur dijeni për këtë gurore dhe nuk ka firmosur hapjen e saj.
Policia e Delvinës ka nisur shoqërimin e banorëve të fshatit Bajkaj në komisariat
Shoqërimet e banorëve të fshatit janë bërë pas protestës së zhvilluar, ku banorët kundërshtuan hapjen e gurores. Gjatë protestës, banorët e fshatit u përplasën fizikisht me përfaqësuesit e firmës. Ndërkohë, mësohet se policia nuk ka shoqëruar asnjë përfaqësues të firmës apo të ministrisë.
Kryetarja e Bashkisë së Delvinës: Banorët kanë frikë për shkatërrimin e mjedisit
Gazeta “Reforma”, zhvilloi një korrespondencë me Kryetaren e Bashkisë së Delvinës, Znj. Majlind Qilimi.
Nga komunikimi me Kryetaren e Bashkisë së Delvinës, rezulton se banorët kanë frikë për shkatërrimin e mjedisit, por që nga ana tjetër zona synon zhvillimn e agroturizmit.
Në përgjigjen e saj, Znj. Qilimi theksoi se: “Banorët e zonës nuk pajtohen me faktin që në territorin e fshatit Bajkaj të miratohet ndërtimi i një guroreje. Frikë për shkatërrimin e mjedisit, por zona synon zhvillimin e agroturizmit. Leja mjedisore nuk është dhënë dhe dëgjesa kryhej posaçërisht për këtë gjë. Dëgjesa nuk u krye, unë do të përcjell në ministri shqetësimin e banorëve. Jemi duke komunikuar me të gjitha palët”.
Kompania që do ndërtojë guroren ka marrë firmën e Minsitres së Energjitikës, Belinda Balluku
Gazeta “Reforma” zhvilloi një komunikim me përfaqësuesin ligjor të firmës “Dinamika sh.k.p”, Z. Janaq Papajorgji. Gjatë prononcimit Z. Papajorgji theksoi se leja për ndërtimin e gurores është dhënë drejtpërdrejtë nga ana e Ministres së Infrastrukturës dhe Energjitikës, Znj. Belinda Balluku. Z. Papajorgji vuri në dukje se: “Kompania ka fituar një tender para dy vjetësh ku si rrjedhojë këtë plan ndërtimi na e përcaktoi vetë Ministria e Infrastrukturës. Ne e kemi marrë me firmën e Ministres së Energjetikës dhe Infrastrukturës, Znj. Belinda Balluku. Ne ishim si palë e ftuar nga ana e Ministrisë së Mjedisit për këtë çështje. Ne i kemi të tëra letrat. Ne duam të themi të vërtetën sepse edhe media e paraqiti problemin e njëanshëm. Ne na caktoi ministria (Infrastrukturës dhe Energjetikës) që të shkoni atje. Jeni fitues dhe shkoni aty, mund ta verifikoni. Dinamika quhemi ne”.
Ministria e Infrastrukturës dhe Energjitikës shfajëson veten
Në lidhje me këtë çështje, gazeta “Reforma u interesua edhe pranë Ministrisë së Infrastrukturës dhe Energjitikës, organi kompetent për këtë proces në zonën e Delvinës. Nga ajo që morëm si përgjigje rezulton një fiasko e vërtetë nga ana e këtij institucioni, pasi ministira e ka larguar nga vetja përgjegjësinë duke ia atribuar këto kompetenca Bashksië së Qytetit të Delvinës dhe Ministrisë së Turizmit. “Nuk është dhënë asnjë leje për kompaninë në fjalë nga ana jonë. Kompania po zhvillon thjesht dëgjesë publike me banorët. Duhet të kalojë disa faza, që janë më shumë në kompetencë të Bashkisë dhe të Ministrisë së Turizmit e në fund vendosim ne. Në këtë fazë nuk kanë punë me ne”.
Duket se Ministria e Infrastrukturës dhe Energjetikës ka dhënë miratimin për ndërtimin e këtyre guroreve. Të vetmit zëra të pambrojtur janë atë të banorëve të fshatit Bajkaj të cilët edhe një herë po shikojnë se si po u rrezikohet mjedisi dhe jeta e përditshme.
/Gazetareforma
