Ditën e djeshme disa shqiptarë që jetonin e punonin në Kinë thanë se ishin në rrezik dhe kërkuan ndihmë nga shteti shqiptar.
Ditën e sotme Ministria e Jashtme ka reaguar rreth kësaj thirrjeje me anë të një njoftimi për shtyp.
Në njoftim thuhet se Kina nuk rekomandon evakuimin e shtetasve të huaj nga vendet e tyre.
Kjo pasi sipas autoriteteve kineze, çdo shtetas që del nga provinca Wuhan, duhet t`i nënshtrohet një karantine 14 ditore, para se të lëvizë lirshëm.
Kështu, në njoftim shkruhet se ambasada shqiptare në Pekin është duke ndjekur me vëmendjen maksimale situatën dhe është në kontakt të vazhduar me ta.
Por, nuk lajmëron për marrjen e masave dhe evakuimin e shqiptarëve.
Njoftimi i plotë i Ministrisë së Jashtme
” Nisur nga situata epidemike e coronavirusit nCOV në Provincën e Hubeit me kryeqytet Wuhan, autoritetet kineze kanë informuar mbi numrin e të infektuarve, masat e emergjencës dhe rregullat e forta administrativo-shëndetësore që duhet të ndiqen pas kësaj situate nga të gjithë shtetasit e huaj që jetojnë në Kinë.
Zyrtarët kinezë bënë me dije se, disa vende kanë kërkuar evakuimin e shtetasve të tyre përmes avionëve “charter”, por, sipas tyre, në këtë situatë, ky hap nuk është i nevojshëm dhe nuk rekomandohet nga pala kineze. Në raste të tilla duhet të ndiqen të gjitha rregullat ndërkombëtare si dhe rregullat e masave parandaluese të vendosura nga autoritetet kineze, që, sipas tyre, po zbatojnë një sërë procedurash te komplikuara që nga lejet e fluturimeve, etj.
Sipas përfaqësuesve të MPJ kineze, cdo shtetas që del nga provinca Wuhan, duhet t`i nënshtrohet një karantine 14 ditore, para se të lëvizë lirshëm.
Nga statistikat e publikuara nga autoritetet kineze sa i takon situatës epidemike nCOV deri tani janë:
• 2,823 raste të konfirmuara
• 5,794 raste të dyshuara
• 58 të rikuperuar
• 81 vdekje
Pekini ka 72 raste të konfirmuara, 2 të rikuperuara dhe asnjë vdekje.
Provinca e Hubeit me kryeqytet Wuhan ka numrin më të lartë të rasteve me 1,423 të konfirmuara, 47 të rikuperuara dhe 76 vdekje.
Të gjitha provincat kanë raportuar raste dhe në shumicën prej tyre është shpallur gjendja e emergjencës së shkallës së parë, niveli më i lartë i emergjencës. Ndërkohë, përvec Kinës dhe vendeve fqinje, virusi tashmë ka kaluar edhe në kontinente të tjera, përfshirë edhe Europën.
Nisur nga kjo situatë dhe nga fakti që një numër shqiptarësh studiojnë, punojnë dhe jetojnë atje, ambasada shqiptare në Pekin është duke ndjekur me vëmendjen maksimale situatën dhe është në kontakt të vazhduar me ta.
Ministria për Evropën dhe Punët e Jashtme do të vijojë të mbajë të informuar qytetarët për zhvillimet e situatës.
Ministria për Evropën dhe Punët e Jashtme
Drejtoria e Diplomacisë Ekonomike, Publike dhe Diasporës. ”
Coronavirusi deri tani ka marrë 81 jetë njerëzish dhe ka infektuar mbi 2 mijë të tjerë.
Virusi që lindi fillimisht në Wuhan të Kinës pritet që të përhapet në të gjithë globin.
