Ndotja e bregdetit është duke u kthyer në shqetësim serioz, sidomos për banorët e Lagunës së Merxhanit në Lezhë, e cila rrjedhimisht rrezikon edhe bregdetin e Shëngjinit.
Laguna e Merxhanit momentalisht ndodhet në një gjëndje të tmerrshme, pasi është mbuluar nga algat, gjë që është duke krijuar katastrofë ekologjike, e cila shkatërron jo vetëm botën ujore.
Tashmë është bërë e ditur se nuk është hera e parë që ndodh, pasi sipas banorëve përsëritet për të tretin vit radhazi dhe nga ajo që është përcaktuar, ndotja vjen nga derdhja e ujërave të zeza përmes hidrovorit.
Mirëpo shqetësim të madh kanë shprehur edhe banorët, të cilët thonë se ndotja e lagunës ka krijuar një armë shumë të rëndë dhe të gjendur para këtyre fakteve ata kërkojnë zgjidhje nga institucionet përkatëse.
Sipas specialistit të Mjedisit, Jak Gjini, ndotja që është krijuar deri më tani është duke sjellë degradim të biodiversitetit dhe sigurisht është duke dëmtuar rëndë habitatet ujore, duke marrë parasysh që është një gjendje tashmë e përsëritur.
Specialisti bën thirrje për ndërhyrje të menjëhershme, pasi nëse situata vazhdon e tillë, bregdeti i Shëngjinit do të jetë i pari i prekur nga kjo katastrofë, e cila jo vetëm do të dëmtonte vendin, por edhe turizimin duke qenë se jemi vetëm një muaj larg çeljes së sezonit turistik.
