Rreth 900 të helmuar dhe 2 viktima, shpallet gjendja e jashtëzakonshme në Deçan

Situata me helmimet në Deçan të Kosovës, ka marrë përmasa tragjike. Ndërkohë që me anë të një shkrese zyrtare, kryetari i komunës së Deçanit, Bashkim Ramosaj ka bërë të ditur se në bazë të Ligjit për Vetëqeverisje Lokale dhe Ligjit për Parandalimin dhe Sëmundjeve Ngjitëse të Statutit të komunës së Deçanit ka marrë vendim që të shpallet gjendje emergjente në tërë territorin e kësaj komune.
Me anë të këtij vendimi obligohen të gjitha institucionet e nivelit lokal për Ngritjen e Gatishmërisë për Menaxhimin e kësaj situate Emergjente e ndodhur pas helmimit të fundit.
Sjellim në vëmendje se që nga dita e shtunë e deri më sot rreth 900 qytetarë të Deçanit kanë kërkuar ndihmë mjekësore, pasi dyshohet se u helmuan nga uji i pijshëm, ndërsa në 24 orët e fundit situata është përkeqësuar dhe dy persona kanë ndërruar jetë. Dyshimet paraprake për vdekjen e dy qytetarëve lidhen pikërisht me helmimin nga uji i pijshëm , për rastin në fjalë Prokuroria Themelore ka nisur hetimet paraprake. Gjithashtu kujtojmë se kryetari i komunës së Deçanit ditën e djeshme në një komunikat zyrtare lidhur me situatën tha që rezultatet kimike nuk kanë nxjerr asgjë nga uji i pijshëm, gjithashtu ai hodhi dyshime të forta se mund të jetë e qëllimshme dhe tha se çështja do të hetohet pasi është hera e dytë që përsëritet e njëjta situatë në një periudhe kohore të shkurtër. Gjatë ditës së djeshme në një komunikat zyrtare edhe Presidentja e Kosovës ka kërkuar që të zbardhen të gjitha rrethanat dhe të çohen deri në fund hetimet.