Ukraina po bën tashmë pothuajse 4 muaj luftë, ndërkohë që tashmë ka ardhur një paralajmërim i fortë nga presidenti Volodymyr Zelenskyy.
Ai pretendon se Rusia do t’i shtojë sulmet e saj këtë javë ndërsa liderët e Bashkimit Evropian vlerësojnë nëse do të lejojnë Ukrainën të bashkohet me bllokun, shkruan SkyNeës. Ndërkohë vlen të përmendim se Moska ka bërë kërcënime të përsëritura kundër lejimit të Ukrainës për t’u bashkuar me BE, por udhëheqësit perëndimorë kanë qenë kryesisht mbështetës.
Zelensky u shpreh: “Natyrisht, këtë javë duhet të presim nga Rusia një intensifikimin e aktiviteteve të saj armiqësore. Ne jemi duke u përgatitur. Jemi gati.”
Kujtojmë që presidenti rus Vladimir Putin javën e kaluar tha se ai nuk kishte “asgjë kundër” aplikimit të Ukrainës, por përqafimi i Ukrainës nga BE do të ndërhynte në synimet e Moskës për të mbajtur fqinjin e saj jashtë sferës së ndikimit të Perëndimit.
Udhëheqësit e BE-së do të shqyrtojnë ofertën e Ukrainës në një samit të enjten dhe të premten, por ekzekutivi i BE-së – Komisioni Evropian – ka rekomanduar që ajo të vazhdojë. Megjithatë, vetë procesi mund të marrë shumë vite për të përfunduar. Presidenti ukrainas Volodymyr Zelensky i ka bërë thirrje Bashkimit Evropian që të rrisë regjimin e sanksioneve ndaj Rusisë, ku ka kërkuar një paketë të shtatë masash ndëshkuese kundër Moskës.
27 vende të BE-së ranë dakord në fund të muajit të kaluar për një paketë të gjashtë sanksionesh që do të ndalonte shumicën e importeve të naftës ruse, por përjashtuan naftën e papërpunuar që shpërndahet përmes tubacioneve, për shkak të kundërshtimeve të Hungarisë.
