Ukraina po bën tashmë pothujse 2 muaj luftë, ndërkohë që presidenti i Ukrainës Zelenskyy bën thirrje ndaj Bashkimit Evropian që të reduktojë varësinë nga nafta ruse.
Zelensky tha se Bashkimi Europian duhet të përfshijë naftën dhe gazin në paketën e të ardhshme të sanksioneve, duke i ndaluar ato.
Teksa foli në parlamentin lituanez, Zelensky vlerësoi vendet që kanë ndaluar importet e gazit rus, por kritikoi BE-në për hezitimin e tepërt në sanksionimin e Rusisë.
BE-ja u takua të hënën për të diskutuar për grupin e gjashtë të sanksioneve, të cilat mund të përfshinin naftën dhe gazin rus, por nuk arritën një marrëveshje.
Kujtojmë që vende dhe organizma ndërkombëtare kanë vendosur dënime dhe sanksione ndaj Rusisë. Asambleja e Përgjithshme e Kombeve të Bashkuara sapo ka votuar për të pezulluar Rusinë nga Këshilli i saj për të Drejtat e Njeriut gjatë një sesioni në Nju Jork. Ai pason akuzat për krime lufte nga trupat e Kremlinit në Ukrainë.
Përpara se të hidheshin votat, ambasadori i Ukrainës në OKB Sergiy Kyslytsya akuzoi Rusinë për abuzime “të tmerrshme” – duke ngritur çështjen e vrasjeve të dyshuara të civilëve në qytetin e Bucha. Përfaqësuesi i Rusisë, Genadi Kuzmin, e dënoi votimin dhe kombet e tjera, përfshirë Korenë e Veriut dhe Sirinë, u mblodhën pas tij.
