Teksa ndodhemi në muajin e fushatës elektorale, politikanët hapin “thesin” e premtimeve për qytetarët. Ditën e sotme kryeministri i vendit, Edi Rama, ka zhvilluar një takim elektoral në Mallakastër, ku ndër të tjera ka premtuar 24 orë ujë të pijshëm për zonën. Duket paradoksale që teksa ndodhemi në vitin 2023 dhe ndonëse Partia Socialiste po bën 10 vite radhazi në pushtet sërish qytetarët gjenden përballë premtimeve bazike dhe qesharake në të njëjtën kohë, për vetë faktin se uji i pijshëm është një “instrument” i përdorur ndër vite si premtim elektoral.
“Janë bërë investime të rëndësishme, nga qershori do keni 24 orë ujë të pijshëm në shtëpi. Do të ngremë infrastrukturën për prodhimin e vajit të ullirit, do t’i japim një zhvillim industrisë së ullirit. Zgjedhjet e 14 majit shkojnë përtej këtyre çështjeve, prek në fakt një çështje thelbësore, çfarë dhe kush duam ne të jemi në vitet që vijnë. Dua të jemi një vend që të shikohet si një shtet serioz nga partnerët tanë”, tha Rama.
Gjithashtu gjatë fjalës së tij, kryeministri Rama ka zgjedhur krahasimin me “zorrën qorre” për opozitën, të cilën thotë se duhet goditur më 14 Maj. Rama është shprehur se kandidatët e Partisë Socialiste kanë avantazhe pasi sipas tij “janë shalqi me provë” dhe për më tepër thotë se kanë edhe një shalqi më të madh me provë në Tiranë.
“Kandidatët tanë kanë 2 avantazhe të mëdha: Janë kandidatë që janë shalqi me provë, edhe kastraveci është i mirë për sallatë, por shalqi nuk bëhet. Qerimi është shalqi me provë. Ka edhe një avantazh tjetër që ka edhe një shalqi më të madh në Tiranë që është po ashtu me provë. Të diskutosh kandidatët tanë me ato të zorrës qorre është të mos jesh në rregull fare sepse nuk po shkon në stadium. Këtu zgjedh atë që të mbush syrin se e bën punën më mirë se të tjerët”, u shpreh Rama ndër të tjera në fjalën e tij.
