Një ngjarje e rëndë ka ndodhur në zonën industriale të “Qafës së Burrelit”, në territorin e bashkisë Klos, ku një rrëshqitje masive dheu ka mbuluar një ekskavator dhe punonjësin që ndodhej në të.
Incidenti ndodhi disa ditë më parë, rreth orës 14:30, në fabrikën e përpunimit të kromit që operon në këtë zonë.
Menjëherë pas ngjarjes është aktivizuar një operacion i gjerë kërkimi dhe shpëtimi, i koordinuar nga Ministria e Mbrojtjes.
Në terren janë angazhuar një sërë strukturash shtetërore dhe mbështetëse:
• Shërbimi i Zjarrfikëses dhe Shpëtimit i bashkisë Klos
• Forcat e Policisë
• Ekspertë të Autoritetit Kombëtar për Sigurinë dhe Emergjencat në Miniera (AKSEM)
• Ekip mjekësor me autoambulancë
• Vullnetarë nga komuniteti lokal
• Forca të Armatosura me pajisje për detektimin e metaleve
• Punonjës të Agjencisë Kombëtare të Burimeve Natyrore
Sipas të dhënave paraprake, rrëshqitja ka mbuluar një sipërfaqe të konsiderueshme, rreth 500 metra në gjatësi, 20 metra në gjerësi dhe me thellësi mbi 4 metra.
Terreni mbetet i paqëndrueshëm dhe ekziston rreziku i rrëshqitjeve të reja, çka ka bërë që operacioni të zhvillohet me kujdes të shtuar.
Pavarësisht përpjekjeve intensive, deri në këtë fazë nuk është arritur të lokalizohet trupi i punonjësit, ndërsa operacioni për gjetjen dhe nxjerrjen e tij vazhdon.
Autoritetet nuk kanë dhënë ende informacion për identitetin e viktimës së mundshme.
