KAKAVIJË
Dy të moshuar, që ishin duke pritur në radhë në Doganën e Kakavijës, janë ndjerë keq.
Për rrjedhojë, ata janë nisur me urgjencë drejt Spitalit të Gjirokastrës.
Të moshuarit kishin orë që prisnin në doganë dhe pritja e gjatë ka bërë që shëndeti i tyre të dobësohet.
Kutjojmë se në Kakavijë është krijuar një radhë e gjatë kilometrike e makinave, që shkon deri 20 kilometër, deri në fshatin Jorgucat.
Disa prej personave apo familjarëve në pritje kanë thënë se kanë 3 ditë që ndodhen në radhë dhe situata është bërë e padurueshme.
Disa prej tyre madje kanë paralajmëruar se do të nisen në këmbë drejt Greqisë, njësoj siç bëhej dikur, pasi gjendja është mizerable.
Radhët e gjata janë krikuar më së shumti për shkak se Greqia kërkon që çdokush që kalon në tokën greke të bëjë tamponin e koronavirusit.
Shumë emigrantë shqiptarë mbetën në Shqipëri pas mbylljes, për shkak të Covid-19.
Duket se edhe tashmë që kufijtë janë hapur, ata po hasin në pengesa të panumërta. Koronavirusi, ndër të tjera ka shkaktuar edhe një krizë ekonomike, sidomos tek kjo kategori, që jeton me të ardhurat që nxjerr nga puna jashtë vendit.
