Sot gjykata do të japë masën e sigurisë për 5 të arrestuarit që akuzohen për rrëmbimin dhe vrasjen e Jan Prengës.
Deri më tani në pranga kanë rënë Leonard Hajri 36 vjeç, babai i tij Bajram Hajri 64 vjeç, kushëriri Elton Hajri 32 vjeç, një tjetër anëtar i familjes, Festim Bexhdili dhe shoku i tyre Olsi Turja 36 vjeç, të gjithë banues në Shijak.
Këta persona akuzohen për “Rrëmbim personi”, “Fshehje ose asgjësimi i kufomës”, “Veprime që pengojnë zbardhjen e të vërtetës”, “Përkrahja e autorit të krimit”, të kryera në bashkëpunim dhe “Armëmbajtja pa leje”.
Këta persona së bashku me Altin Hajrin, pronari i kompleksit ‘Golden’ në Shijak mendohet se kanë ekzekutuar urdhrin nga krerët e bandës që kishin porositur rrëmbimin e Jan Prengës në Kamëz më 17 janar të këtij viti.
Rrëmbimi i Prengës ka ardhur për shkak të një sasie prej 240 kg kokainë, e cila nuk ka shkuar në destinacionin përkatës. Kështu, me rrëmbimin e Jan Prengës u mendua që t’i bëhej presion vëllait të tij, Astritit, përgjegjës për sasinë e kokainës.
Në kërkim janë shpallur të paktën 11 persona.
Mësohet se porosia për rrëmbimin e Jan Prengës më 17 janar në Kamëz, është dhënë nga Dritan Rexhepi, i cili është person në kërkim për vrasjen e dy efektivëve të policisë në Krujë, ndërkohë që aktualisht ndodhet në një burg të sigurisë së lartë në Quito të Ekuadorit.
