Nuk kanë dhënë asnjë rezultat kërkimet e deritanishme të policisë për gjetjen e trupit të pajetë të Jan Prengës që u rrëmbye në janar të vitit të kaluar në Kamëz. Megjithëkëtë, Prokuroria e Posaçme Kundër Korrupsionit dhe Krimit të Organizuar ka përfunduar hetimet për dy prej të dyshuarve dhe ka dorëzuar dosjen penale ndaj tyre në gjykatë.
Dy personat në fjalë janë Festim Bexhdili, kopshtari i resortit Hajri dhe Olsi Turja. Mbi ta rëndon akuza e rrëmbimit kryer në bashkëpunim, me pasojë vrasjen e babait të 3 fëmijëve. Bexhdili është i vetmi që mbahet në paraburgim për rrëmbimin, torturimin e më pas vrasjen e Prengës. Ndërkohë, burime nga SPAK bëjnë me dije se ndaj Bixhdilit dhe Turjas janë ngritur akuza zyrtare duke qenë se afatet e paraburgimit ishin drejt fundit. Turja është liruar më herët, por sërish ai do të ulet në bankën e akuzës.
Hetimet do të vazhdojnë për të dyshuarit e tjerë sepse konsiderohen komplekse dhe kërkojnë më shumë kohë.
Jan Prenga u rrëmbye në janar të vitit 2020 në Kamëz nga 4 persona dhe prej atëherë nuk ka asnjë të dhënë prej tij. Sipas hetimeve të kryera, rezulton se rrëmbimi i 49-vjeçarit u urdhërua pasi vëllai i tij, Astrit Prenga grabiti një sasi prej 260 kg kokainë në Britaninë e Madhe. Dyshohet se porositësi i krimit mund të jetë Gentian Docaj Fuqini nga Shkodra. Ai kontaktoi me vëllezërit e Prengës dhe i kërkoi që t’i rikthehej malli në këmbim të jetës së 49-vjeçarit.
Po ashtu, familja e Prengës u kontaktua edhe nga Dritan Rexhepi, i burgosur në Ekuador i cili sipas hetimeve rezulton të jetë personi që organizoi nisjen e kokainës nga port ii Portsmoouth në Angli. Megjithëse Astrit Prenga ktheu një pjesë të madhe të kokainës dhe pagoi një shumë të konsiderueshme panudësh, nga Jan Prenga nuk ka asnjë të dhënë. Për këtë arsye Dritan Rexehpi i tregoi vëllezërve të viktimës emrat e rrëmbyesve. Nga të dhënat e policisë, u bë me dije se Prenga është dërguar i pajetë në resortin Hajri, në pronësi të Altin Hajrit dhe dyshohet se është groposur në atë zonë.
