Gjykata e Posaçme e Apelit për Korrupsionin dhe Krimin e Organizuar vendosi sot, më 25 korrik, të lërë në fuqi vendimin e shkallës së parë, duke e dënuar me burgim të përjetshëm Festim Bexhdilin, i njohur si kopshtari i kompleksit “Golden” në Shijak, në pronësi të shumëkërkuarit Altin Hajri.
Ai akuzohet për rrëmbimin dhe zhdukjen e Jani Prengës më 17 janar 2020, ngjarje që nisi në Kamëz dhe përfundoi në kompleksin famëkeq në Shijak.
Vendimi i sotëm i Apelit u dha pas rigjykimit të çështjes, pasi më herët Gjykata e Lartë kishte prishur vendimin e mëparshëm të Apelit dhe kishte urdhëruar rishqyrtimin e saj me një trup gjykues të ri. Pavarësisht këtij zhvillimi, trupa aktuale e Apelit arriti në të njëjtin përfundim: dënim maksimal për Bexhdilin.
Gjatë seancës së 11 korrikut, dy prokurorët e SPAK që përfaqësuan çështjen dhanë qëndrime të ndryshme për masën e dënimit: Behar Dibra kërkoi 20 vite burg, duke argumentuar se i pandehuri kishte vepruar nën frikë dhe nuk kishte dijeni për vendndodhjen e trupit të viktimës.
Ndërkohë, prokurorja Elida Kaçkini kërkoi burgim të përjetshëm, duke theksuar mungesën e pendesës nga ana e të pandehurit dhe rolin e tij aktiv në grupin kriminal.
Vetë Festim Bexhdili mohoi përfshirjen direkte në krim, por pranoi se kishte vepruar në fazën fillestare për shkak të frikës: “Edhe prokurorja po të ishte, do vepronte ashtu, nga halli! Ishalla bëhet drejtësi!” deklaroi ai në sallën e gjyqit.
Kujtojmë se Jani Prenga u rrëmbye në mes të ditës në Kamëz dhe më pas u dërgua në kompleksin “Golden” në Shijak, ku u zhduk pa lënë gjurmë. Trupi i tij nuk është gjetur as sot e kësaj dite, ndërsa hetimet kanë zbuluar përfshirjen e një grupi të strukturuar kriminal të lidhur me trafikun ndërkombëtar të drogës.
Me këtë vendim, Apeli i GJKKO-së konfirmon përfundimisht përgjegjësinë penale të Bexhdilit në një prej ngjarjeve më tronditëse kriminale të viteve të fundit në vend.
