Seanca gjyqësore për çështjen e rrëmbimit dhe zhdukjes së Jan Prengës është shtyrë për në datën 21 maj, ora 09:00. Në bankën e të pandehurve janë Dritan Rexhepi dhe disa persona të tjerë të dyshuar për përfshirje në ngjarje.
Në seancën e fundit ishte i pranishëm edhe Aldo Majnishta, një nga të pandehurit kryesorë, i cili refuzoi të japë deklarime përpara trupit gjykues.
Ndërkohë, avokatët mbrojtës kërkuan më shumë kohë për t’u njohur me provat e reja të dorëzuara nga prokurorët e SPAK në seancën e mëparshme. Provat përfshijnë përgjime të komunikimeve të koduara në platformën SKY ECC, që konsiderohen kyçe në këtë hetim.
Ngjarja tragjike ka ndodhur më 17 janar 2020, kur Jan Prenga u rrëmbye në zonën e Kamzës. Sipas SPAK, rrëmbimi ishte i organizuar nga Dritan Rexhepi, i njohur edhe si Gromos Rexhepi, dhe Gentjan Funiqi (Doçaj), të dy me precedentë penalë në fushën e trafikut të drogës. Ata dyshohet se urdhëruan rrëmbimin në fund të dhjetorit 2019, si një akt hakmarrjeje ndaj vëllait të viktimës, Astrit Prenga, i cili nuk dorëzoi një sasi kokaine që kishte marrë përsipër të transportonte nga Amerika Latine në Britani.
Përveç Rexhepit dhe Funiqit, si bashkëpunëtorë në rrëmbim dhe vrasje akuzohen edhe Martin Bleta, Korado Keshteja, Artan Doçaj, Aldo Majnishta, Geraldo Martini dhe Altin Hajri – ky i fundit pronari i kompleksit “Golden Resort” në Shijak, ku dyshohet se Jan Prenga është mbajtur peng dhe është parë për herë të fundit.
Hetimet kanë zbuluar se rrëmbimi lidhet me një sasi kokaine që kishte destinacion Britaninë e Madhe. Përgjimet telefonike të kryera në Ekuador ndihmuan autoritetet shqiptare të zbardhin lidhjet kriminale dhe motivet pas këtij krimi të rëndë.
