Më e lehtë të mbjellësh kanabis së sa duhan, pas rregullave të fundit që ka hartuar Ministria e Bujqësisë. Projektligji përcakton se kultivimi i duhanit në Shqipëri do të lejohet vetëm në rast se fermerët nënshkruajnë kontratë paraprake me grumbulluesit apo fabrikat. Ndërsa këta të fundit do të kenë detyrim ngrirjen e garancisë financiare për sasinë që do të blejnë.
Relacioni i ministrisë sqaron se një vendim i tillë merret për të shmangur rastet e refuzimit të pagesave. Madje, fermerët nuk do të lejohen të kultivojnë duhan nëse nuk disponojnë NIPT.
Drafti detyron kultivuesit që të lidhin kontratë paraprake jo më vonë se data 31 mars e çdo viti për duhanet orientale dhe gjysmë orientale dhe 30 Prilli për varietetet e tjera.
Ata që do të veprojnë jashtë këtij rregulli do të ndëshkohen me gjobën ne vlerën 100 mijë lekë.
Farat dhe fidanët që do të përdoren duhet të jenë të certifikuara dhe do të blihen në subjektet e licencuara. Për t’i dhënë fund rasteve kur grumbulluesi nuk paguan fermerët është vendosur dhe kushti i një garancie financiare.
15 ditë para fillimit të sezonit të grumbullimit duhet të paraqesin zyrtarisht në institucionin përgjegjës për duhanin garancinë e lëshuar nga një institucion financiar i licencuar, që siguron shlyerjen 100% të kontratave të nënshkruara
Në këtë rast nëse fermeri nuk merr pagesën brenda afati 30 ditor nga dorëzimi i sasisë ka të drejtë të kërkojë nga institucioni financiar ekzekutimin e garancisë për shlyerjen e detyrimit.
Projektligji ndalon tregtimin e duhanit të hapur. Projektligji pretendon se do të sigurojë për arkën e shtetit 20-25 milion Euro, që tani janë tregti informale e duhanit.
/GazetaReforma.com/
