Mëngjesin e sotëm ka ndërruar jetë tek Trauma, 21-vjeçari Aldi Rama i cili qëlloi për vdekje ditën e djeshme nënkomisarin e policisë, Saimir Hoxha. I riu u dërgua pasditen e djeshme në spitalin e Traumës me urgjencë.
Në komisariat u shoqëruan ditën e djeshme dy personat që ishin me Ramën në momentin që qëlloi Saimir Hoxhën. Një nga shokët e tij është rrëfyer në polici. Ai ka thënë se Aldo Ramën e ka pasur shok , pasi ka qenë në një qeli me vëllain e tij. Ai ka treguar edhe një pjesë nga jeta e vështirë që ka kaluar 21-vjeçari.
“E kam patur shok Aldin, ka qenë në një qeli me vëllain tim. I çoja ushqime çdo ditë edhe vëllait tim edhe këtij. Aldi ka qenë 2 herë në burg, në 2018 dhe njëherë në 2020. Njëherë për një problem me një person dhe në 2020 që e kapën me 20 qese hashash e një thikë. Ndenji disa muaj në burg. Ka patur jetë të vështirë, prindërit i ka të divorcuar. Babin e ka në burg ka vrarë një grek e ka masakruar me motosharrë, është i dënuar për jetë”, tha ai.
Kujtojmë se ditën e djeshme 21-vjeçari Aldi Rama ka qëlluar për vdekje nënkomisarin e policisë, Saimir Hoxha në Ishëm Lezhë, ky i fundit ndodhej në zonë për asgjësim të parcelave me kanabis.
