Një ditë pasi u përfshinë në një sherr në mes të qytetit të Fierit, policia ka vënë në pranga efektivin Anxhelo Bardhi dhe shokun e tij me iniciale D.R., pasi akuzohen se kanë goditur me mjete të forta dhe me grushta gazetarin, Xhoel Osmanaj.
Mësohet se Bardhi është me detyrë oficer i Patrullës së Përgjithshme në Stacionin Policor Roskovec dhe akuzohet për veprat penale të “Kanosjes”, “Prishjes së qetësisë publike” dhe “Shkatërimit të pronës” kryer në bashkëpunim.
Ngjarja ka ndodhur mbrëmjen e së shtunës, ku dy të rinjtë që nuk kishin pasur autorizim për të lëvizur, i kanë bërë pritë makinës me të cilën po udhëtonte 23-vjeçari Xhoen Osmanaj i shoqëruar nga një mikeshë e tij.
Mes të rinjve ka nisur një konflikt i dhunshëm, derisa ndërhyri policia, teksa efektivi Anxhelo Bardhi është pezulluar menjëherë nga detyra.
Njoftimi i Policisë:
Mbrëmë rreth orës 20:00 punonjësi i policisë A.B. dhe shoku i tij, shtetasi D.R., në qendër të Fierit, kanë goditur me mjete të forta dhe grushta shtetasin Xh.O., duke i shkaktuar dëmtime fizike.Nga veprimet hetimore të kryera, rezulton se shkak ishin motive të dobëta. Përveç dëmtimeve fizike, dy agresorët kanë dëmtuar mjetin e të riut. Një patrullë policore ndërhyri menjëherë në vendngjarje dhe i shoqëroi në Komisariat, duke parandaluar përshkallëzimin e ngjarjes. Ndërkohë Drejtori i Përgjithshëm i Policisë së Shtetit e pezulloi menjëherë nga detyra Inspektorin. Pamjet filmike të ngjarjes janë administruar në cilësinë e provës materiale në funksion të hetimeve. Të gjitha veprimet e kundraligjshme dhunuesit i kanë kryer duke thyer fashat orare të përcaktuara në aktet ligjore në fuqi për gjendjen e jashtëzakonshme, fakt ky i dënueshëm. Veprimet proceduriale u kryen në prani dhe në drejtimin e Prokurorit dhe materialet hetimore i kaluan për hetime të mëtejshme Prokurorisë pranë Gjykatës së Shkallës së Parë Fier. SHÇBA gjen rastin të falënderojë qytetarët dhe median për bashkëpunimin dhe fton këdo të telefonojë falas në 0800 90 90 për çdo shkelje apo abuzim të punonjësve të Policisë.
