Superndeshja Juventus-Milan për Superkupën e Italisë ka përfunduar pa surpriza të mëdha.
Tashmë ishte e pritshme fitorja e Juventusit ndaj Milanit dhe rezultati ka qenë 1-0 dhe kjo falë golit të bërë nga Cristiano Ronaldo.
Për Juventusin kjo është fitorja e 8 e kësaj kupe dhe shënon vetëm një më shumë sesa “djajt e kuq”.
Sipas komentatorëve ndeshja nisi jo pa të papritura, pasi Gatusso kishte zgjedhur të zbriste në fushë pa sulmuesin Higuain. 45 minutat e para floën më shumë për Juventusin, që në disa raste i shkoi fare pranë golit. Madje në një rast arriti ta gjente atë me Matuidin, por më pas u anullua nga VAR.
Në fraksionin e dytë të lojës, ekzaktësisht në minutën e 61, të besuarit e Allegrit realizuan golin që vulosi sfidën me autor Cristiano Ronaldon, i cili finalizoi me kokë një asist perfekt të Pjanic. Si të mos mjaftonte disavantazhi, Milani në minutën e 73-t mbeti me një lojtar më pak në fushë, pasi Kessie u largua me karton të kuq. Mesfushori 22-vjeçar ndërhyri ashpër ndaj Emre Can dhe me ndihmën e “VAR” arbitri I ndeshjes nuk e fali.
Për afërsisht 20 minuta në lojë ishte edhe Higuain, por “El Pipita” i cili është pranë transferimit te Chelsea, nuk arriti t’i ndryshonte udhën kësaj sfide. Në fund fiton Juve, e cila konfirmon edhe një herë supermacinë ndaj skuadrave italiane.
