Ylli juventin, Cristiano Ronaldo rezultoi poztiv me Covid-19 edhe në testin e dytë që bëri ditën e djeshme duke humbur kështu mundësinë e artë dhe të shumëpritur nga të gjithë për të debutuar përballë “armikut” të tij të përhershëm Lionel Messi.
Një lajm i tillë nuk u prit mirë as nga tifozët e CR7 por duket se as kapiteni i katalanasve, Messi nuk e do diçka të tillë, pasi në një intervistë të dhënë së fundmi për spanjollen “DAZN” ai u shpreh se dueli i tij me Ronaldon është special e ashtu do të jetë gjithmonë, duke shpresuar se ai do të shërohet për sfidën e të mërkurës mes Juventusit dhe Barcelonës.
“Dueli me Ronaldo ishte dhe është special dhe ai do të qëndrojë përgjithmonë. Sfida mes nesh zgjati për shumë vite dhe sigurisht që nuk është aspak e lehtë të qëndrosh në nivele të larta për shumë vite.Ekipet tona gjithashtu ishin të shkëlqyera. Real Madrid dhe Barcelona janë dy klubet më të forta në botë dhe ai duel do të mbahet mend gjithmonë. Mendoj se njerëzve i ka pëlqyer sfida mes nesh dhe në aspektin personal ishte diçka e bukur”, deklaron 33-vjeçari.
“Dueli me Juventusin? Shpresoj që të mërkurën ta shikojmë sërish këtë duel. Të gjithë kërkojmë që Ronaldo të shërohet nga Covid-19 dhe të jetë në fushë. Kur ai ishte në fushë atëherë për Realin, ndeshjet ishin akoma dhe më speciale. Kjo tashmë i përket së kaluarës dhe tashmë ne jemi përqendruar në sfidat e sotme”, mbyll Messi.
Ndërkohë kujtojmë se para pak ditësh Ronaldo u infektua me Covid-19 gjatë kohës që ishte grumbulluar me Kombëtaren e tij për ndeshjet e Ligës së Kombeve.
Ai u kthye menjëherë në shtëpinë e tij në Torino ku është izoluar dhe po pret me pa durim momentin që do të shërohet dhe t’i kthehet ekipit të tij, Juventusit.
