Për shkak të situatës së krjuar nga Covid-19, Ministria e Financës dhe Ekonomisë i ka propozuar qeverisë shtyerjen deri në fund të vitit procesin për rivlerësimin e pasurisë.
Qytetarët nuk kanë pasur mundësi të kryejnë vlerësimin e pasurisë së tyre me tatim të ulët, për shkak të pandemisë së koronavirusit.
Përgjatë muajve Shkurt dhe Mars ishte parashikuar të kryhej procesi i rivlerësimit për ata qytetarë që kishin nxjerrë shtëpinë në shitje ose kërkonin që të linin pasurinë kolateral në bankë.
Sipas “Balkanweb”, aplikimet për rivlerësim të pasurisë nuk do të vazhdojnë deri në fund të shtatorit por deri në 31 dhjetor.
Vendimi për këtë shtyrje pritet të merret në mbledhjen e radhës të qeverisë.
Deri më tani sipas të dhënave të siguruara nga agjencia shtetërore e kadastrës në total kanë aplikuar 20 mijë qytetarë.
Kjo shifër pritet të rritet në muajt në vijim pas heqjes së masave kufizuese që ishin vendosur për parandalimin e Covid-19.
Rivlerësimi i pasurisë është një mundësi që qeveria e jep për herë të tretë për qytetarët duke mundësuar që ata të paguajnë tatim në burim të pasurisë së tyre në masën 3% nga 15% që ishte më parë.
Kështu nëse një qyetar ka blerë një apartament para disa vitesh në vlerën 50 mijë euro por sot e shet atë 70 mijë euro atëherë ai duhet të paguajë një taksë 15 % mbi diferencën e cmimit të shitjes me atë të blerjes.
Në këtë rast diferenca është 20 mijë euro dhe detyrimi tatimor që paguhet nga qytetari është 3 mijë euro.
Me ligjin e ri i jepet e drejta qytetarit që të rivlerësojë banesën me cmimin e tregut duke paguar jo 15% por vetëm 3%.
Rrjedhimisht taksa zbret nga 3 mijë euro që duhet të paguajë normalisht në vetëm 600 euro pra 5 herë më pak.
Dy vjet më parë nga kjo nismë përfituan 64 mijë persona.
