Dita e sotme shënon 30 vite nga rivendosja e marrëdhënieve mes Shqipërisë dhe Shteteve të Bashkuara të Amerikës. Këtë përvjetor të veçantë e ka uruar edhe ambasadorja Yuri Kim me një postim në Tëitter duke cituar ish-sekretarin amerikan të shtetit, James Baker. Kim thotë se ashtu si para 30-vitesh, SHBA është edhe tani në krah të Shqipërisë.
“Më 15 Mars 1991, Flamuri i Shteteve të Bashkuara dhe Flamuri i Shqipërisë rivendosën marrëdhëniet, duke rilidhur zyrtarisht njerëzit e dy vendeve tona.
Kur Sekretari i Shtetit Baker erdhi në Shqipëri, ai deklaroi: “Ne jemi me ju dhe ju jeni me ne!” Kjo deklaratë mbetet e vërtetë sot. Do të jetë gjithmonë e vërtetë. Gëzuar!” -shkruan ambasadorja Kim.
Lidhur me rivendosjen e marrëdhënieve mes dy vendeve ka reaguar edhe kreu i PD, Lulzim Basha i cili shkruan se Shqipëria nuk duhet të harrojë kurrë dhe duhet të jetë mirënjohëse . Kjo dekadë duhet të jetë dekada e konsolidimit të demokracisë, sipas kryedemokratit.
“30-vjetori i rivendosjes së marrëdhënieve mes Shqipërisë dhe Shteteve të Bashkuara të Amerikës është një mundësi e shkëlqyer për çdo shqiptar, për t’u ndierë krenar për arritjet e mëdha që Shqipëria ka bërë falë mbështetjes së SHBA dhe veçanërisht anëtarësimin e saj në NATO dhe pavarësinë e Kosovës. Ne nuk duhet të harrojmë kurrë dhe duhet të jemi gjithmonë mirënjohës. Ne do të punojmë së bashku me partnerin tonë strategjik, SHBA, që dekada e re të jetë dekada e konsolidimit të demokracisë, sundimit të ligjit dhe e mirëqenies së gjithë shqiptarëve.”, shkruan Basha.
