Presidentja e Kosovës, Vjosa Osmani ka kundërshtuar prerë idetë për rivendosjen e kufijve të Kosovës. Osmani ka thënë gjatë një takimi me ministrin e Jashtëm të Maqedonisë së Veriut Bujar Osmani, se ide të tilla janë të rrezikshme. Të njëjtin qëndrim ka mbajtur edhe ministri Bujar Osmani. Kundërshtimin e këtyre ideve presidentja e bëri të ditur që pas takimit me ministrin e Jashtëm Gjerman, Heiko Maas të enjten në Prishtinë.
“E kemi ritheksuar dhe e ritheksojmë se ide të tilla janë të rrezikshme për rajonin dhe përtej rajonit”, ka deklaruar ajo.
Edhe Maas ka qenë në të njëjtën linjë për idetë që kanë qarkulluar së fundi për një ndryshim të kufijve në Ballkanin Perëndimor. “E konsiderojmë të rrezikshëm edhe vetëm diskutimin që bëhet për këtë çështje”,deklaroi Maas.
Ministri u shpreh se dëshiron që kjo ide të lihet shpejt në sirtar dhe të jetë pjesë e së shkuarës. Maas ka deklruar se se nuk është në dijeni për projekte nga ana e kryeministrit slloven Janez Jansha, të cilat ky i fundit mendohet se i ka dorëzuar në Brukselin zyrtar.
“Nuk e di nëse ka projekte të tilla. Fakti që është folur për non-paper, është termi i duhur. Duhet të mbetet ashtu. Sa i përket ideve për ndryshime të kufijve, Qeveria gjermane i refuzon fuqishëm ato sepse një zgjidhje e tillë nuk çon në zgjidhje të problemeve”, ka thënë ministri gjerman.
