Procesi i rinumërimit të votave për zgjedhjet parlamentare të 11 majit vijon në Qarkun e Tiranës, ku deri më tani janë hapur 160 kuti votimi.
Të dhënat paraprake të publikuara nga Komisioni Qendror i Zgjedhjeve tregojnë lëvizje të lehta në numrin e votave të regjistruara fillimisht, përfshirë humbje të dukshme për dy forcat kryesore politike.
Sipas bilancit të deritanishëm, deri në orën 17:45:
• Partia Socialiste ka humbur 67 vota.
• Koalicioni Partia Demokratike – Aleanca për Shqipërinë Madhështore ka humbur 59 vota.
Ndryshimet e evidentuara deri tani janë të pjesshme dhe nuk ndikojnë ndjeshëm në përbërjen e mandateve, por përfaqësojnë një element me peshë në verifikimin e saktësisë së procesit zgjedhor.
Edhe partitë e tjera që morën pjesë në garë kanë shënuar devijime të vogla në rezultatin fillestar.
Procesi i rinumërimit pritet të vijojë edhe në ditët në vijim, për të përmbyllur verifikimin e të gjitha kutive të parashikuara nga vendimi i KQZ-së, me synim garantimin e transparencës dhe integritetit të plotë të votës së qytetarëve.
