Procesi i rinumërimit të votave në qarkun e Tiranës dhe disa qarqe të tjera vijon me ritëm të qëndrueshëm, por ende larg përfundimit.
Sipas anëtarit të Komisionit të Ankimimeve dhe Sanksioneve, Ledio Braho, deri më tani është rinumëruar vetëm rreth 10% e kutive, ku shumica e problemeve të konstatuara lidhen me gabime njerëzore.
Stafet e Komisionit Qendror të Zgjedhjeve po vijojnë punën në dy turne për të përshpejtuar procesin, ndërsa çdo rast i dyshuar ose i paqartë po shqyrtohet në mënyrë të veçantë nga KAS, që ka marrë vendime për korrektime aty ku është e nevojshme.
Ledio Braho, anëtar i KAS: Stafi i KQZ po numëron votat. Kur votat kanë qenë të diskutueshme, KAS ka vendosur. Janë numëruar më pak se 10 përqind e të votave. Partitë e mëdha kanë humbur vota nga procesi. Edhe te kandidatët ka pasur lëvizje votash, kanë qenë vota të diskutueshme, janë çështje subjektiviteti të grupeve të numërimit. Deri tani parregullsisë kanë qenë njerëzore. Dje u rinumëruan 87 qendra votimi, sot procesi i rinumërimit do të jetë me dy turne. Qarku Tiranë kërkon kohë fizike më shumë, duke qenë se ka më shumë kandidatë. Qëllimi është që sa më shpejt të dalë rezultati.
