Bashkia e Tiranës ka falur taksën e hapësirës publike për 10 mijë biznese për muajin e marsit dhe të prillit.
Lajmi është bërë i ditur në një intervistë për Top Channel nga kryebashkiaku Erion Veliaj, i cili deklaroi se gjitha ato biznese që operojnë në kryeqytet nuk do e paguajnë këtë taksë, ndërkohë për të lehtësuar sa më shumë ato, çdo detyrim tjetër do të shtyhet për në qershor.
Po ashtu, në këtë periudhë pandemie, Bashkia do të shtyjë deri në 15 shtator taksën e hoteleve, duke bërë që të përfitojnë rreth 300 hotele në kryeqytet.
“Për çështjen e taksave, më kanë pyetur shumë qytetarë. Për 10 mijë biznese që janë në Tiranë dhe që përdorin hapësirën publike ne do të falim taksën e hapësirës publike për të gjithë periudhën e marsit dhe do t’i paraprijmë edhe prillit. Pra për mars dhe prill, bëhet 0 taksa për bizneset që përdorin hapësirën publike në Tiranë. Ndërkohë që për çdo detyrim tjetër do të shtyhet për në Qershor. Kështu që askush nuk duhet të ketë ankthin se do të ketë kamatvonesë ose penalizime. Duke e shtyrë për në qershor i japim një hapësirë kujtdo që të bëjmë edhe ne reduktimin e muajve që nuk ka pasur punë”, thekson Veliaj.
Sa i përket çështjes së kredive të buta, kryebashkiaku Veliaj nënvizoi se afati për aplikimet do të shtyhet dhe askush nuk do të privohet.
“Për rreth mbi 1 mijë aplikantë që ne kemi për banesat me kredi të butë, ne e kemi shtyrë aplikimin deri në maj. Prapë nuk ka asnjë ngut për një familje të re që kërkon të adresojë strehimin e vet, do të ketë kohë deri në maj që të përfitojë nga skema e Bashkisë. Kështu që nuk ka asnjë arsye që të jenë në ankth apo të paduruar për të kapur orët e punës, që ne në fakt i kemi dedikuar vetëm për emergjencat, nga ora 8 e mëngjesit deri në 13”, deklaroi Veliaj.
