Prokuroria e Tiranës ka ndërhyrë në ambientet e kompanisë farmaceutike “CFO Pharma”, në pronësi të Nadir Çaushollit, duke sekuestruar dokumentacionin dhe të gjithë inventarin e lidhur me rimbursimet e barnave. Aksioni u urdhërua nga prokurori Ndini Tavani, ndërsa prej ditës së djeshme zyrat e kompanisë janë të rrethuara nga forcat e policisë.
Hetimet janë zgjeruar edhe tek dy kompani të tjera të lidhura me “CFO Pharma”, përkatësisht “Pharma Plus” dhe “Medyx Albania”. Prokuroria dyshon se këto tre subjekte janë përfshirë në një skemë të faturave të rreme dhe shitjes fiktive të barnave, me qëllim përfitimin e rimbursimeve nga shteti. Në qendër të hetimit ndodhen veçanërisht dy medikamente për trajtimin e astmës, Foster dhe Trimbow, të prodhuara nga kompania italiane “Chiesi Farmaceutici”.
Në një reagim publik, pronari i “CFO Pharma”, Nadir Çausholli, e cilësoi ndërhyrjen e Prokurorisë si një sulm të drejtpërdrejtë ndaj kompanisë së tij. Ai deklaroi se arsyeja e kësaj goditjeje lidhet me faktin se kompania e tij do të marrë ekskluzivitetin e shpërndarjes së barnave Foster dhe Trimbow në Shqipëri. Sipas Çaushollit, pas kësaj çështjeje fshihet një konflikt konkurrence, të cilin ai e lidhi me biznesmenin Ilir Shehu (i njohur edhe si Pasholli), pronar i kompanive “Medicamenta” dhe “Mega Store”.
Hetimet për aferën e rimbursimeve vijojnë, ndërsa Prokuroria ka paralajmëruar kontrolle të mëtejshme për të zbuluar përmasat e plotë të skemës së dyshuar.
