Ditën e djeshme qeveria shqiptare, miratoi vendimin mbi rimbursimin e paketës së barnave anti-covid, për trajtimin ambulator të pacientëve me covid-19 që kurohen në shtëpi.
Në vendimin e miratuar nga Këshilli i Ministrave, paketa e barnave të rimbursuara anti-covid, përbëhej nga dy skema trajtimi.
Në skemën e parë të trajtimit ku përfshihet forma e lehtë e sëmundjes, vlera e rimbursimit të paketës së barnave, do të jetë jo më shumë se 1650 lekë.
Ndërsa në skemën e dytë të trajtimit, ku përfshihet forma e mesme e sëmundjes, vlera e rimbursimit të paketës së barnave, do të jetë jo më shumë se 10 900 lekë.
Në vendim parashikohet se në bazë të protokolleve të përcaktuara nga Fondi i Sigurimit të Detyrueshëm të Kujdesit Shëndetësor (FSDKSH), mjeku i familjes do të japë recetën me rimbursim për pacientët e infektuar me covid-19.
Mirëpo bazuar në denoncimet publike dhe ankesat e qytetarëve të infektuar me covid-19, kostot e një pacienti me koronavirus janë shumë herë më të larta se sa vlera që ka vendosur të rimbursojë qeveria.
Sipas denoncimeve, kostot për një pacient me koronavirus që trajtohet në banesë, shkojnë deri në 1200 euro, ndërkohë që Qeveria me vendimin e saj rimburson në vlerën 12-90 euro.
Deri më tani nuk është bërë ende e ditur se mbi çfarë baze janë përcaktuar këto vlera rimbursimi të paketave të kurimit të pacientëve me koronavirus nga qeveria. Gjithashtu nuk figuron ende asnjë protokoll standart i unifikuar në lidhje me trajtimin e pacientëve me Covid-19.
VENDIMI
Në mbështetje të nenit 100 të Kushtetutës dhe të pikës 6, të nenit 10, të ligjit nr.10383, datë 24.2.2011, “Për sigurimin e detyrueshëm të kujdesit shëndetësor në Republikën e Shqipërisë”, me propozimin e ministrit të Shëndetësisë dhe Mbrojtjes Sociale, Këshilli i Ministrave
V E N D O S I:
Rimbursimin e paketës së barnave për trajtimin ambulator në banesë për personat e diagnostikuar me COVID-19 nga Fondi i Sigurimit të Detyrueshëm të Kujdesit Shëndetësor.
Paketa e barnave për trajtimin ambulator në banesë të pacientëve të diagnostikuar me COVID-19 përbëhet nga dy skema trajtimi, në përputhje me formën e sëmundjes, sipas udhëzuesit të miratuar nga Komiteti Teknik i Ekspertëve.
Vlera e rimbursimit të paketës së barnave për skemën 1 të trajtimit (forma e lehtë) do të jetë jo më shumë se 1 650 (një mijë e gjashtëqind e pesëdhjetë) lekë.
Vlera e rimbursimit të paketës së barnave për skemën 2 të trajtimit (forma e mesme) do të jetë jo më shumë se 10 900 (dhjetë mijë e nëntëqind) lekë.
Mjeku i familjes, për personat e testuar pozitiv për Sars-Cov-2 (të konfirmuar nga institucionet shëndetësore publike përgjegjëse), në përputhje me formën e sëmundjes dhe indikacionet e përcaktuara në udhëzuesin e miratuar nga Komiteti Teknik i Ekspertëve, lëshon recetën me rimbursim, sipas rregullave të përcaktuara nga Fondi i Sigurimit të Detyrueshëm të Kujdesit Shëndetësor.
Për diagnozën COVID-19, e gjithë popullata konsiderohet përfituese nga skema e sigurimeve shëndetësore, duke u regjistruar dhe identifikuar si e siguruar.
Efektet financiare për zbatimin e këtij vendimi do të përballohen nga buxheti i Fondit të Sigurimit të Detyrueshëm të Kujdesit Shëndetësor.
Ngarkohen Ministria e Shëndetësisë dhe Mbrojtjes Sociale dhe Fondi i Sigurimit të Detyrueshëm të Kujdesit Shëndetësor për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”./GazetaReforma.com/
