Numri i rasteve të reja me koronavirus në gjithë botën po rritet me shpejtësi duke i detyruar shumë shtete që të rikthejnë masat kufizuese.
Kështu e radhës është Çekia e cila ka vendosur për të rikthyer orën policore nga ora 21:00 deri në 05:00 për të parandaluar sa më shumë përhapjen e Covid-19. Kjo masë do të hyjë në fuqi nga kjo e mërkurë, 28 tetor deri më 3 nëntor dhe ata që përjashtohen nga ndalimi janë njerëzit që udhëtojnë në punë ose që kërkojnë ndihmë mjekësore.
Dyqanet me pakicë që ende funksionojnë nën kufizimet aktuale duhet të mbyllen deri në orën 20:00. Të dielave gjithçka duhet të jetë e mbyllur , me përjashtim të pikave të karburantit, farmacive ose dyqaneve në stacionet e trenit dhe pikat e tjera të udhëtimit.
Në një konferencë për shtyp, ministri i Shëndetësisë i Çekisë, Roman Prymula, tha se masat e vendosura deri më tani siç është mbyllja e bareve, restoranteve, dyqaneve për shitje me pakicë dhe shkollave – nuk kishin arritur të ulnin shkallën e infeksionit.
Republika Çeke raportoi 5,474 raste të reja në 24 orë të hënën, duke e çuar numrin e përgjithshëm të infeksioneve në 263,572.Numri i vdekjeve aktualisht qëndron në 2,337.
