Mbyllja e sporteleve të punës në pikën kufitare të Kapshticës pas plotësimit të kuotës prej 300 personash ka rikthyer kaosin në doganë.
Dosja.al ka mësuar se mbi 60 emigrantë shqiptarë ndodhen të bllokuar në pikën kufitare të Kapshticës, dhe midis emigrantëve ka edhe të moshuar, fëmijë dhe të sëmurë.Thirrjet e tyre janë të vazhdueshme për autoritetet që të marrin masa në zgjidhjen e këtij kaosi. Një qytetare u shpreh për mediet se udhëtarët rezikojnë që të humbasin edhe vendet e punës nga kjo vonesë në doganë. Ajo ka sqaruar se të gjithë kanë bërë tamponin dhe aplikimin online.
“Ne këtu jemi që në orën 09:00 të mëngjesit. Greku na tha që janë plotësuar kuota, Ne kemi bërë edhe tamponët. I lutemi qeverisë që të kalojë këta persona, se nuk u bë qameti. Tani na thonë duhet të presim deri nesër në orën 06:00 të mëngjesit. Këtu do rri derisa të më kalojnë, atje unë do humbas vendin e punës. Duhet të përgjigjet edhe shtetit shqiptar dhe shtet. Ne paguajmë taksa andej, taksa këtej. Do na mbarojë edhe aplikimi online” , u shpreh një qytetare.
Kujtojmë se ky vendim ka hyrë në fuqi që me 17 gusht 2020, ku thuhej se nga pika kufitare e Kakavijës do të kenë mundësi të kalojnë vetëm 750 persona në ditë, ndërsa nga ajo e Kapshticës vetëm 300 persona në ditë, në fashën orare 06:00 deri në orën 22:00, konform rregullave të vendosura nga pala greke, si pasojë e situatës së krijuar nga COVID-19.
