Një sulm me thikë ka ndodhur në Vetlanda të Suedisë dhe po trajtohet nga policia si një “krim i dyshuar terrorist”. Autoritetet fillimisht morën raporte se disa njerëz ishin sulmuar me një “sëpatë”. Patrullat e para të policisë arritën në qendër të qytetit 10 minuta më vonë. Tetë persona janë konfirmuar të jenë plagosur në incidentin, i cili ndodhi rreth 190 kilometra nga Gothenburgu, qyteti i dytë më i madh i Suedisë, shkruan Euroneës. Një i dyshuar rreth 20 vjeç u qëllua nga policia në vendin e ngjarjes dhe është arrestuar.
“Personi i arrestuar është plagosur, por situata është e paqartë,” tha policia në një deklaratë, duke shtuar se individi u dërgua në spital.
Fillimisht, policia filloi hetimin e incidentit si vrasje në tentativë por konfirmoi se tani po e klasifikon sulmin si një “krim të dyshuar terrorist”.
“Policia ka situatën nën kontroll në Vetlanda, situata më urgjente tani ka mbaruar dhe puna e policisë tani është gjithnjë e më e përqendruar në punën hetimore,” kanë thënë autoritetet.
“Aktualisht nuk ka asnjë tregues për më shumë autorë të dyshuar në këtë incident”.
Policia ka shtuar se ata janë në kontakt me tetë viktimat dhe nuk ka indikacione se dikush ka vdekur. Një hetim për veprimin e policisë gjatë arrestimit të të dyshuarit gjithashtu ka filluar.
“Për shkak të këtij hetimi, policia nuk do të komentojë më tej për arrestimin dhe pse policia ka hapur zjarr,” thuhej në deklaratë.
Në vitin 2017, pesë persona u vranë kur një kamion u rrëmbye dhe shtypi qëllimisht këmbësorët në një rrugë në qendër të kryeqytetit, Stokholm. Sulmi u përshkrua si “krimi më i madh i kryer ndonjëherë” në vend.
