Janë rikthyer ngricat dhe bora në veri. Ndërsa pritet për pak ditë të afrojë Dita e Verës, veriu i vendit po zbradhet duke risjellë edhe njëherë probleme në qarkullim.
Dibra është zbardhur e gjitha, ndërsa rrugët që lidhin Peshkopinë me Kukësin dhe me Librazhdin kalohen me zinxhirë për shkak të trashësisë së borës.
Autoritetet kërkojnë nga firmat kontraktore të monitorojnë situatën dhe të jenë në gatishmëri për të ndërhyrë në kohë që të mos kemi bllokime.
Në zona të thella reshjet e borës kanë nisur që në orët e para të mëngjesit dhe për pasojë trashësia kalon 25 cm.
Ndërkohë rruga nacionale Peshkopi-Tiranë po monitorohet nga firma kontraktore e cila ka në dispozicion 6 mjete borëpastruese dhe 3 fadroma në gatishmëri.
Për shkak të situatës problematike në akset veriore, mëngjesin e sotëm katër automjete janë përplasur në rrugën nacionale Klos- Bulqizë.
Aksidenti ka ndodhur në afërsi të vendit të quajtur “Qafë Dushk” për shkak të ngricës në rrugë të krijuar nga reshjet e dëborës. Mësohet se nga aksidenti nuk pati të lënduar në njerëz, por vetëm dëme materiale.
Edhe pse sasia e borës e rënë një ditë më parë në këtë aks nuk ishte shumë e madhe, prania e ngricave gjatë natës dhe orëve të para të ditës së sotme ka krijuar probleme.
