Reshjet e dëborës janë rikthyer sërish në juglindje të vendit, në Korçë e në fshatrat turistikë Dardhë e Voskopojë.
Mësohet se trashësia e reshjeve të dëborës në fshatin turistik të Dardhës ka shkuar në 6 cm. Drejtuesve të mjeteve në këto zona u bëhet thirrje që të pajisen me gomat e dimrit, si dhe me zinxhirë. Mjetet turistike që i janë drejtuar Dardhës kanë mbetur të bllokuar në afërsi të pistës së skive.
Sakaq pritet ndërhyrja e borëpastruesve për normalizim të situatës. Po ashtu edhe në qytetin e Korçës ka pasur reshje shiu që nga mëngjesi i sotëm.
Aksi nacional drejt fshatit turistik të Dardhës në Korçë është bllokuar si pasojë e reshjeve të dëborës.
Instituti i Gjeoshkencave përsërit thirrjen që për tre ditët në vazhdim autoritetet të jenë në gatishmëri pasi priten reshje intensive, nga data 23-26 janar.
Nga llogaritjet hidrologjike të IGJEUM, këto reshje do të sjellin rritje të prurjeve dhe niveleve në Lumenjtë Drin-Buna, Liqenin e Shkodrës dhe Lumin Vjosa. Në pjesët e sipërme të këtyre baseneve lumorë, mund të ketë vërshime të shpejta të përrenjve dhe lumenjve më të vegjël të shoqëruara edhe me rrëshqitje të dherave, kryesisht në qarqet Shkodër, Kukës, Vlorë dhe Gjirokastër.
Lumenjtë e tjerë do kenë rritje të prurjeve por parashikohen me rrezik më të ulët nga përmbytjet./Gazetareforma.com/
