Protesta e dhjetorit të studentëve vendosi në lëvizje shumë prej institucioneve dhe disa prej projekteve që ishin menduar në të ardhmen, erdhën më afër.
Një nga kërkesat më me zë, ishte padyshim edhe përmirësimi i kushteve në konvikte dhe qeveria e ka miratuar vendimin për rikonstruksionin e tyre, mirëpo ku po qëndrojnë studentët që ishin brenda këtyre godinave?
Ata vazhdojnë të qëndrojnë të akomoduar aty. Ndërkohë që punëtorët janë duke bërë detyrën e tyre për rikonstruksionin e godinës, studentët qëndrojnë mes smogut dhe zhurmave, pa u marrë asnjë masë.
Konkretisht në godinën 26 dhe 27 janë të akomoduara rreth 270 vajza dhe rikonstruksioni i godinës 27 i cili ka nisur rreth një javë më parë, ka çuar në bllokimin e tualeteve dhe dusheve, gjë që i detyron vajzat të lëvizin nga njëra godinë në tjetrën për kryerjen e nevojave personale.
“Ka një javë që ka nisur. Zhurmat, lëvizjet, janë çunat që hyjnë e dalin në një godinë vajzash. Problem ngelen dushet dhe banjat. Nuk dihet sa do zgjasë sepse ka godina që kanë nisur më parë dhe nuk kanë përfunduar”, thotë një studente e godinës 27.
“Jam tek godina 29. Rikonstruktimi ka filluar që dy javë. Në pjesën e jashtme janë vendosur skelat. Ne jemi informuar nga kujdestarja që nga 29 do shkojmë tek 28-a deri sa të mbarojnë punimet dhe më pas do jetë anasjelltas. Nuk e dimë se sa do zgjasë. Dushet janë vetëm në katin e parë dhe në të dy godinat përdoren aktualisht dhe ndërkohë që punëtorët janë duke punuar”, tregon një studente tjetër.
Ndërkohë që vet Drejtoria Arsimore në Qytet Studenti nuk ka pranuar të jap asnjë deklaratë rreth kohëzgjatjes së punimeve apo zgjidhjes që i kanë dhënë problematikave tashmë të evidentuara.
