Ministrja e Shëndetësisë, Ogerta Manastirliu ka bërë me dije se ditët e hapura të vaksinimit do të rikthehen në Shqipëri pas mbërritjes së 340 mijë dozave të radhës. Gjatë një vizite në stadiumin “Air Albania” për të inspektuar procesin e vaksinimit, Manastirliu tha se ditët e hapura për vaksinimin e personave mbi 18 vjeç, do të fillojnë të hënën e ardhshme deri në 25 korrik.
Ajo bëri me dije se deri tani në Shqipëri kanë ardhur më shumë se 1 milionë e 500 mijë doza vaksine, ndërsa të hënën priten edhe 32 doza të Pfizer. Manastirliu u bëri thirrje qytetarëve mbi 18 vjeç që të vaksinohen gjatë këtyre ditëve.
“Pas mbërritjes së 340,000 dozave të vaksinave, kemi vendosur të kthejmë sërish ditët e hapura të vaksinimit, sipas planit të vaksinimit dhe rekomandimeve të ekspertëve të shëndetit publik. Do të jenë datat, nga dita e hënë e javës që hyjmë, deri në datë 25 korrik. Do të jetë java e parë e hapur e vaksinimit për të gjithë qytetarët +18 vjeç, në të gjitha qendrat shëndetësore, në pikat e vaksinimit masiv, duke shkuar edhe derë më derë. Do të jemi në komunitet për të realizuar këtë vaksinim të popullatës +18 vjeç në këtë javë të vaksinimit. Aktualisht në Shqipëri janë më shumë se 1 milion e 500 mijë doza vaksine të mbërritura. Ndërkohë që të hënën ne presim dhe rreth 32 mijë doza të vaksinës Pfizer, për të vijuar me planin e vaksinimit dhe për ta zgjeruar akoma më tej, tha Manastirliu.
