Internacionalja e Qendrës së Djathtë miratoi një rezolutë të hënën që mbështet opozitën shqiptare.
Gjatë protestës në rrugën “Mustafa Matohiti”, reagoi kryetari i Partisë Demokratike, Sali Berisha, i cili e cilësoi rezolutën si “më të fuqishmën kundër regjimit në Shqipëri që nga koha e Enver Hoxhës”.
Berisha theksoi se kjo rezolutë është një mbështetje për luftën e opozitës ndaj qeverisë aktuale, duke e krahasuar situatën e sotme me periudhën e diktaturës komuniste.
“Miqtë e mi, sot paradite Internacionalja e Qendrës Demokrate, organizata që grupon sëbashku 108 parti politike nga të gjitha kontinentet, organizatë planetare, ka folur në një seancë më fuqishëm se kurrë ndonjëherë ndokush për secilin prej jush, për Opozitën shqiptare, për narkodiktaturën e Edi Ramës, për narkodrejtësinë e tij.
Pra, sot është miratuar rezoluta më e fuqishme kundër regjimit në Shqipëri. Që nga koha e Enver Hoxhës, sot është miratuar me unanimitet të plotë, pa asnjë kundërshtim nga përfaqësues të këtij forumi botëror, planetar rezoluta në mbështetje të Opozitës shqiptare, të çdo opozitari të këtij vendi, të demokracisë.
Ndaj dhe, të dashur miq, në emër tuaj të shpreh mirënjohjen më të pakufijshme ndaj ëprfaqësuesve të ëktij forumi botëror të partive politike në këtë forum botëror për këtë mbështetje të madhe që i dhanë Opozitës shqiptare, për këtë dënim ekzemplar që i rezervuan narkodiktaturës së Edi Ramës.
I garantoj në emër tuajin se, beteja jonë kundër narkoregjimit do të jetë betejë fitimtare”, theksoi Berisha.
