Kryeministri Edi Rama është paraqitur në seancën e sotme plenare me një kollare ku shkruhej “Revolution” (Revolucion). Ashtu si kollarja, edhe fjalimin që ka përzgjedhur për të mbajtur në foltore, Rama e ka mbuashur me terma revolucionar teksa ka komentuar hapjen e pjesshme të listave të kandidatëve për deputetë dhe heqjen e koalicioneve parazgjedhore.
“Kjo votë përputhet me ambicien për demokracinë”, tha kryeministri, duke shtuar se është e drejtë e Parlamentit shqiptar për të vedosur për ndryshimet kushtetuese. “Shteti shqiptar i merr vendimet nëpërmjet Parlamentit”, tha ai.
Mesazhi nuk ishte vetëm për opozitën jashtëparlamentare, por edhe për ambasadorët e SHBA-së dhe BE-së, të cilëve Rama iu drejtua në mënyrë të drejtpërdrejtë
“Miqtë e partnerët tanë ta dëgjojnë mirë se ky është vendim i Parlamentit e i takon shtetit shqiptar përmes Parlamentit të vendosë se çfarë bën me sistemin zgjedhor. S’është zgjedhje që kemi detyrimin ta ndajmë as me ambasadoren amerikane as me të BE-së e askënd tjetër, duke i respektuar maksimalisht.
E them se u bënë 30 vjet e s’mund të bëhen 30 të tjera nëse vazhdojmë të mos i themi gjërat siç janë.
Natyrisht s’është përgjegjësia e amabsadores amerikane, të BE, që ne prej 30 vitesh kërkojmë në anglisht zgjidhjen e problemeve shqiptare.
Kur dëgjoj ambasadoren amerikane që thotë se “do i ndjekim me vëmendje drejtuesit politke a do e mbajnë fjalën apo jo”, sinqerisht nuk më vjen mirë, jo për veten time por edhe për të gjithë ne dhe ajo fjali është arsye për çdo person në këtë vend, socialistë e demokratë të mos e bëjnë qesharak popullin e vendin e vet, të mos bëjë qesharak shtetin e vet sepse e kemi krijuar ne këtë trashëgimi të ulët e cila është vazhdim i një historie të gjatë moskuptimesh mes shqitparëve që kanë çuar shqiptarët në situata të pajustifikueshme fare e nuk e kanë lënë këtë vend të bëhet ai që Zoti ka krijuar me bujari të madhe””, u shpreh Rama.
