Ministri i Brendshëm Bledi Çuçi ka bërë me dije se në mbledhjen e sotme të qeverisë është miratuar marrëveshja e nënshkruar mes programit të Zhvillimit të Kombeve të Bashkuara dhe qeverisë shqiptare. Çuçi tha se marrëveshja bashkon donatorë që janë të përfshirë në modernizimin e qeverisjes vendore duke krijuar një fond të përbashkët. Ministri shtoi se do të ngrihen instrumenta monitorimi të qevëerisjes vendore dhe do të bëhet i mundur monitorimi i qeverisjes vendore dhe në bazë të performancës, vëmendja për bashkitë do të jetë asimetrike.
“Pas mbledhjes së qeverisë miratuam marrëveshjen e nënshkruar mes programit të Zhvillimit të Kombeve të Bashkuara dhe qeverisë shqiptare. Është përdorur me sukses nga viti 2013 kur e dizenjuam Reformën Territoriale dhe ky program është i treti në radhë quhet “Star 3”. Bashkon donatorë që janë të përfshirë në modernizimin e qeverisjes vendore duke krijuar një fond të përbashkët. Donatorët janë BE, Suedia dhe Zvicra. Kryesisht ky fond do të shkojë për të përsosur modernizimin në nivel lokal. Revolucionin në qeverisjen lokale duam ta bëjmë edhe në qeverisjen lokale. Nga ana tjetër do të ngrihen instrumenta monitorimi të qeverisjes vendore i cili do të bëjë të mundur që në bazë të performancës së çdo bashkie edhe vëmendja e qeverisë do të jetë asimetrike. Suksesi i kësaj marrëveshje është i garantuar”, tha Çuçi.
