Një operacion i forcave speciale greke në burgun e Janinës ka përfunduar me një revoltë të ashpër nga të burgosurit, të cilët reaguan me dhunë, duke djegur dyshekë dhe sende të tjera. Tre zjarrfikëse u dërguan menjëherë për të shuar zjarrin, ndërsa forca të shumta policore vazhduan operacionin.
Forcat speciale EKAM dhe MAT, së bashku me Shërbimin e Kontrollit të Brendshëm, ndërhynë në burg që në orën 06:00 të mëngjesit për të ekzekutuar disa urdhër arreste dhe për të kryer kontrolle për drogë, armë dhe pajisje të tjera të ndaluara. Urdhër arrestet përfshinin persona brenda dhe jashtë burgut, duke përfshirë edhe zyrtarë të lartë të burgut. Disa nga të burgosurit janë transferuar në burgje të tjera, dhe në vendngjarje ka mbërritur edhe Prokurori për të monitoruar situatën.
Policia kishte katër muaj që hetonte një grup të drejtuar nga Edmond Përbasha, një i dënuar shqiptar i njohur si “Bossi” apo “Shefi”. Përbasha, së bashku me bashkëpunëtorë brenda dhe jashtë burgut, përfshirë policë, gardianë dhe zyrtarë, ishte i përfshirë në aktivitete të paligjshme, përfshirë shpërndarjen e drogës. Burime jozyrtare raportojnë se janë identifikuar të paktën 70 raste të veprimtarive të paligjshme për përfitime financiare.
Detaje të mëtejshme priten të bëhen të ditura në orët në vijim, ndërsa autoritetet vazhdojnë hetimet për të çmontuar rrjetin e krimit brenda dhe jashtë burgut të Janinës.
