Reshjet e dendura të shiut që përfshinë sot pjesën më të madhe të vendit, por gjithashtu edhe Tiranën, nxorrën edhe një herë në pah, problematikat e shumta në shumë qytete të vendit, por edhe në kryeqytet. Përvec ujit që vërshonte kudo, kjo edhe për shkak të mungesës së kanalizimeve, por edhe mungesës së një investimi në këtë drejtim, një tjetër problematik shumë shqetësuese në Tiranë, sapo nisin pak reshje shiu, është ajo e trafikut. Akset më të rëndësishme të kryeqytetit janë përballur me trafik të rënduar, aq sa drejtuesve të automjeteve iu është dashur që të qëndrojnë me orë të tëra pa lëvizur thuajse aspak. Që nga zona e ish-doganës, te Zogu i Zi, zona e Fabrikës së Miellit apo dhe në rrugën e Kavajës, pasditen e kësaj të premteje ishte e pamundur të lëvizje, qoftë me automjet personal, po ashtu edhe me shërbimin urban.
Shumë qytetarë kanë hasur vështirësi, për shkak të vonesave të autobuzëve urban, ndërkohë që te Zogu i Zi për gati një orë, qarkullimi u paralizua plotësisht, në të dy senset e lëvizjes drejt Laprakës. Për të ardhur në ndihmë, efektivë të shumtë të policisë rrugore janë përpjekur të asistojnë në pakësimin e trafikut, por edhe për ta ka qenë e pamundur, për t’i dhënë zgjidhje një problemi, që në fakt i takon tjetër kujt ta zgjidhë. E ndërsa sa herë moti ndryshon dhe sjell reshje shiu, qytetarëve në kryeqytet iu duhet të përballen me situata të tilla, ndërkohë që kreu i Bashkisë së Tiranës, Erion Veliaj duket se zgjidhjen e gjen vetëm te korsitë e biçikletave, ndërsa për automjetet, e vetmja zgjidhje është të qëndrojnë nga 2 apo 3 orë në trafik.
